AZL: I&PR Minister Lalruatkima’n Inrinni zing khan Tuikual North-a Tuikual Futsal Ground thar a hawng.
Futsal ground hi MLA Fund bakah sum awm thei remchang chi hrang hrang dap hmanga a hmun laih zawl atanga sak zawh a nih thlenga Rs nuai 48 sen a ni.
A chhuat hi 40 metre x 20 metre-a zau cement slab chhun niin a chungah artificial turf phah a ni a. Zanah pawh inkhelh theih turin local council-in solar light an dah bawk.
Aizawl West II bialtu MLA ni bawk, Lalruatkima chuan futsal ground hawn tak chu thalai infiammite bakah nu leh pa te pawhin an taksa hriselna atana an chhawr tangkai a beisei thu a sawi a. He ground hian veng chhung mai bakah veng thenawm te nen pawha inpumkhatna duhawm tak a hrin chhuah zel a beisei thu a sawi bawk.
Tuikual Futsal Ground thar hawnna inkhawm hi Aizawl Deputy Mayor, Ward-XII Corporator ni bawk R. Thanglura pawhin a hmanpui a ni.