Afghanistan in One Day International cricket chanchin a vawikhatna atan Pakistan an hneh a. ODI cricket a target an um hlawhtlin san ber ni turin wicket 8 in an chak.
Thawhtanni zana Chennai a MA Chidambaram Stadium a inkhelah hian Pakistan lakah Afghanistan tan Ibrahim Zadran chuan 87 a siam a, Rahmanullah Gurbaz chuan 65 thawhin Rahmat Shah chuan out lovin run 77 a siam bawk.
Chak tura run 283 siam mamawh Afghanistan in over khat hmang bangin wicket hnih chauh hlohin an target hi an umpha a ni.
Afghanistan hian match nga khelh tawhah vawi hnih hnehna an channa a ni a, paruknaah an inhlangkai.
Chennai a vuak hmasak thlang Pakistan tan captain Babar Azam chuan run 74 a siam a. Abdullah Shafique chuan run 58 siamin an innings tawp lamah Iftikhar Ahmed leh Shadab Khan ten run 40 ve ve siamin a tawp khar mahse over 50-ah run 282 an siam.
Afghan bowler rawlthar spinner Noor Ahmad chu che tha berin wicket thum a la a, Mohammad Nabi chuan wicket khat la in Pakistan run rate tih hniam kawngah a pawimawh a. Naveen-ul-Haq chuan wicket hnih a la ve bawk.
Afghanistan hian Pakistan nen ODI inkhel vawi 8 an khelh atang vawikhat an chakna a ni a. Cricket World Cup-ah vawi thum an chakna chauh niin kum 2015 a Scotland an hneh hnuah tun tournament-ah hian England an lo hneh tawh bawk.
Kum 2014 a United Arab Emirates hneh tura run 274 target an um hlawhtlin hnua chak tura target an um hlawhtlin leh sang ber a ni.
Afghanistan hian hnehna an chan avangin match nga hmabak an la nei a, an tan semi-final kawng a la inhawng.
Afghanistan captain Hashmatullah Shahidi chuan, “He hnehna hi kan tana thil duhawm tak, result lawmawm tak a ni. Kan target um hlawhtling tura kan inkhelhdan a tha hle. Kan rilru a fim a, kan tihtur dik tak kan ti.”
“Cricket tha tak kan khel a, zanina kan chak dan hian kan hmalam a inkhelah pawh thui taka minpui turin kan rilruah inrintawkna a siam ang. Tun tournament-ah hian beisei khum a che thei kan ni tih kan inhria.” a ti.
- Match Summary
Pakistan 282/7(50 Overs)
Babar Azam 74 (92)
Abdullah Shafique 58 (75)
Naveen-ul-Haq 2/52 (7)
Noor Ahmad 3/49 (10)
Afghanistan 286/2(49 Overs)
Rahmat Shah 77* (84)
Ibrahim Zadran 87 (113)
Hasan Ali 1/44 (10)
Shaheen Shah Afridi 1/58 (10)