India khawpui, Delhi-a boruak chu a bawlhhlawh leh tan tawh hle a, a aia nasa a nih zui thuai a rinawm niin thuneituten an sawi.
Delhi hi kumtluana khawvel khawpui zinga a bawlhhlawh berna a ni reng thin.
Thlasikah chhan hrang hrang – lo neituten an thlai sengna ro an hal vang te, thli thaw muang lutuk vang te leh sakhaw kût laia halmawi hal nasat thin vang ten a nasa zual thin.
Boruak bawlhhlawh lutuk an an hip nasat avang hian Delhi-a chengte hian kum tin damloh harsatna an neih phah nasa hle.
Thawhtanni khan PM 2.5 level an tih, boruaka bawlhhlawh awm hip luha chuapa a kal zel tur danga natna hrang hrang thlen thei chu 306 zet a ni tih sorkarin a chhinchhiahnaah tar lan a ni.
101 leh 200 inkar a nih chuan a pangngai a ni a, 201 leh 300 inkar chu chhia tia sawi a ni a. 300 chung lam hrim hrim chu ‘chhe lutuk’ tih vek niin 500 chung lam phei chu ‘hlauhawm’ a ni phak tawh a ni.
India-a weather department scientist VK Soni chuan boruak bawlhhlawh dan hi ‘chhe lutuk’ huangah hian ni reilo te hnuah a lut thuai dawn niin a sawi.
Mi chengte pawhin an khawpui zing chuk reng chu an sawisel a, a bikin zingah a zing phui thin hle.
“Ni 10-12 liam ta vel atang khan Delhi boruak hi a chhe zual tan tih ka hre thei, ka mit hian a hriaa ni,” tiin thirsakawr khalh thin pakhatin news agency ANI hnenah a sawi.
Mi cheng dang thenkhat chuan Delhi boruak bawlhhlawh huna a tir lam chauh a la nih thu an sawi a, ‘a nasa zawka lo la thleng lo’ tih an sawi.
Environment Minister Gopal Rai chuan boruak bawlhhlawh zel tur venna tur, Graded Response Action Plan (GRAP) thawh hnihna chu kalpui tan mek a nih thu a sawi.
An tum zingah hian khawpuia lirtheiten khu an tihchhuah a ziaawm theih nan Delhi metro leh electric bus service telin, vantlang inkalpawhna hmanruate chu tam zawk tlan turin an ti.
Minister chuan boruak a bawlhhlawh zualna hmun 13 an chhinchhiah a, hmun dang pariat nen special team dahina bawlhhlawh dan an chhinchhiah zel tih a sawi.
“Tibawlhhlawhtu ber hriat tum a ni a, biomass kang, vaivut nge lirthei tih hriat tum a ni,” Rai chuan a ti.
Lirthei leh thil siamna hmun atanga khu, vaivut leh sik leh sa kal vel hrin chhuahin Delhi hi khawvela khawpui boruak bawhhlawh berah a chantir.
Hetih hun lai hian thli a thaw muang a, lei hnaih boruakah heng bawlhhlawh hi a cham rei phah thin hle.
Lo neituten an thlak sengna ro, thlai dang an chin lehna tura atan tifaia an hal khute chuan Delhi bawhin thli a nat loh avangin a châm rei thin a, hei hian a tibawlhhlawh nasa thei hle a. Tunah hian hal nasat vanglai a la thleng lo zawk.
An thenawm state – Punjab, Haryana leh Uttar Pradesh khawthlang lama lo neitute hian an hal nasa thei hle a ni.
Hmarthlang atanga thli thawin a khute hi Delhi-ah achhem lut thin niin air quality forecast agency SAFAR chuan a sawi.
India-a boruak bawlhhlawh lutuk hi Delhi-ah chauh ni lovin khawpui lian dangah awh a tam hle a, khawvela khawpui lian bawlhhlawh ber ber an ni fur hlawm.
Kar hmasa phei kha chuan India-a sumdawnna khawpui, Mumbai-ah a tha lo hle a, tun thla chhungin vawi tam tak Delhi chungah a awm tawh a. Thuneitute chuan ruah a hân tawh a, in sak leh thil siam a tam bawk si a, chu chu a chhan ber niin an sawi.