State Level Media Certification & Monitoring Committee (MCMC) chu nimin khan an thukhawm a, MLA inthlanpui neih tur atana political party-ten electronic media kaltlanga advertisement an tih chhuah tur atana dilna lutte an ngaihtuah.
MCMC Chairman H. Lianzela, Addl. CEO kaihhruaia thutkhawmah hian political party pahnih atanga electronic media kaltlanga political advertisement tihchhuah tur, pre-certification dilna lut 12-te chu ECI-in pre-certification tihna tura dan zawm tur a siamte hmangin uluk taka endik a ni a. Endik zinga a tam zawkah dan pela thil tih ngaihmawhawm a awm loh laiin inkaihhruaina kalh hmuh chhuahte chu siamthat tura hriattir ni se tih a ni.
Thutkhawm kaihruaitu, Addl. CEO H.Lianzela chuan political advertisement pre-certification tih ngai dilna lutte ni hnih chhunga tihfel hman tura hmalak a nih thu a sawi a, dan leh dun ECI-in a zamte zawm a ni em tih endik thin a nih thu a sawi bawk.
Candidate hming leh hamthatna tura advertisement siam reng rengte chuan chhuah phalna District Level MCMC hnenah an dil hmasa tur a ni a. Party leh pawl state hqrs-a political advertisement atan erawh chuan Addl. CEO kaihhruai State Level MCMC-ah dilna thlen tur a ni.
Candidate/party-te tan chhuah hun tur thlen hma ni thumah dilna thehluh hman a ngai a, mi mal/pawl tan erawh chhuah hun tur thlen hma ni sarihah dilna thehluh hman a ngai thung.
Heng dilnate hi ni hnih chhunga ngaihtuah zawh hman tur a ni a. Chanchinbu (print media) kaltlanga chhuah turte tan erawh vote thlak ni leh a hma chiah ni atan pre-certification hi tih a ngai a ni.