- Lalthara, IAS (Rtd)
Tunlai khawvelah hi chuan mihringte hi kan inkalpawlh leh kan inawm pawlh nasat tawh em avang hian, mi thiamte chuan he khawvel hi khawkhat ang maia lo awm ta anga hmu-in, chumi sawinan ‘globalised world/ globalised village’ tih tawngkamte an rawn chherchhuak ta hial a. Chu tih laiin keini Mizote zinga lehkhathiam rual nia kan ngaihte lah hian ‘thiarkar rilru (island mentality) hi kan la kalsan thei meuh lovin, kan khaw thlir hi a zim lutuk deuh thin niin a ngaih theih ta. Entir nan tun hnai thil thleng pahnih khat han sawi ila.
‘Aizawl khawpui bomb chungchang te kht keimahni thlirna zimte atang chauha thlirin, India sawrkar thiltih dik loh lianpui anga ngaiin, kan vuivaina kan sawichhuak chamchi a; thenkhat phei chuan politics khelh nan kan la hmangzui zel leh nghal a! Hmanni lawka Rahul Gandhi an Mizoram a rawn tlawh tum a, MNYF ten Mizote laka thupha chawi tura open letter an lo thawnte pawh kha example pakhat chu a ni awm e. Mahse, thil nih dan leh thlir dan dik zawk nia lang chu hmanni lawka ka rawn ziah ang kha a ni si. Khatah khan:
“Aizawl khawpui indona hmun (battle field) a thlangtu leh siamtu chu MNF President, Pu Laldenga leh hruaitu lawk dangte an nihzia ka rawn tarlang tawh a. Hnam sipai/ volunteers te kha chuan an pute thu awihin an nunna thapin an rawn thawk a ni mai a. “Their’s is not to question why, but to do and die” tih ang kha an dinhmun chu niin a lang. I salute them.
Tin, Ni 20-10-23 a Pi Meriam Hrangchal chungchanga Aizawl a kawngzawh MZP in an huaihawt pawh kha kan khaw thlir kan tih zauh deuh a ngaihzia tilangtu pakhat chu a ni awm e. Tuna India ram dan hman lai leh court rorelna-in a sawi dan chuan ‘tribal hmeichhia in non- tribal a neih chuan, a tribal nihna a hloh chuang lova; an fate erawh chu non- tribal an ni ang a,’ tih hi a ni. Hei vang hian, dan ang thlapin Pi Meriam Hrangchal hian tribal reserved seat hi a chuh thei a ni. (A tlin leh tlin loh hi chu a thangtu mipuite thu thu a ni). Mi thenkhat chuan Mizo hmeichhia-in hnam dang pasal a neih chuan Mizo a ni tawh lo, ti zawngin Mizo customary law hi rawn hrilfiah an tum mek bawk a. India rama dan kan hman mekah hi chuan tribal nihna hi by birth a ni a, hnam dang pasal neih vanga tribal emaw, Mizo emaw ni ta lo anga ngaih hi chu a dik lovang. Non-tribal hmeichhiain tribal mipa pasala a neih hian tribal a nih phah chuang lo ang bawk hi a ni. An fate erawh tribal an ni thung ang.
Eng pawh ni se, Assembly Election leh Mizo customary law hian inlaichinna a nei hran lo.
Pi Meriami pasal chungchang hi chu nasa taka tarlan tawh a ni a; heng atanga lang chu Mizo ni lo mahse, Indian citizen by birth, Mizoram khua leh tui dik tak by birth. A nun leh khawsakah pawh Mizoram khua leh tui dik tak niin, Mizo hming pu, kan khawtlangah leh Kohhranah a kultai a inhmang leh kan hman mek a ni bawk. Tin, amah (a pasal) hian tribal nupui a neih avanga tribal te chanpual tur position leh hamthatna a chuh thu kan hre lo bawk. Tribal awmna state dangah te pawh an ngaimawh ber thin chu non- tribal mipa in tribal nupuiah neia, a nupui hminga tribate chauh tih theih tur, ram lei, contract leh sumdawnna tih vak vak an ching thin hi a ni ber a. Mizoramah pawh hian kan vei tur ber nia ka ngaih chu Kamrula te angho , tribal nupui an neih leh, sawrkar hotu liante nen an inhmelhriatna tha bik rahbi-a hmang a, tribal te chanpual tur dik tak, Mizorama contract hna lian tam tak (normal tender process pawh paltlang si lova) a hui vak vak mai te, work order neih hma hauh pawha hna liam tham a thawk thei mai bik te, Mizo contractorte bill a tan nasat lai pawha a bill chu Sawrkar office hrang hrang (Treasury thlenga) a tlang pur pur mai bik te hi kan ngaihmawh tur leh ram veituten an bengchhenpui tura ka lo it zawk chu a ni.
Hemi kawnga Kan thlirna tizau turin ram danga thil nih dan thenkhat chauh han tarlang ila:
Naga ho hi India independence ruala independence puang ve tawh, an zingah tun thlenga zalenna sualtu, India hnuai la intulut duh ve duh lo, hel pawl tam tak awmna a ni. Mahse, Naga rama awm hlunte an en dan chu keini en dan nen chuan a inzauh hleih hle si a ni. Anni chuan Nagaland in state a hmuh ni kha cut- off date ah hmangin, hemi hma a Naga rama lo awm nghet tawh – heng Kuki, Karbi, Kachari, Garo te hi chu Nagaland Indigenous scheduled tribe ah an pawm thlap a, Naga anga thovin hamthatna an hmu thei a. Tin, scheduled tribe ni ve lo, Gurkhali te pawh indigeneous inhabitant ah pawmin, tribal tana reserve bik thil tih lovah chuan sawrkar hna an pe in, sumdawnna etc ah te pawh an enhrang chuang lo.
Tin, he Globalised world-ah hi chuan ram tam takah hian ram hruaitu thlanna-ah hnam nihna bik (race/ ethnicity) hi chu inenhran nan an hmang tawh lem lo, niin a lang. Ram leh hnam mi (citizen) an nih phawt chuan dinhmun sangah pawh an thlang hreh chuang lem lo. Entir nan chauh han sawi ila;
Tunah hian Heng India ram atanga pem chhuak (Indian by race/ Indian by blood) te hi ram dangah citizenship neiin ram hruaitu a thlan tlin niin, heng dinhmun te hi an chelh mek a ni:
PM of United Kingdom
PM of Ireland
PM of Portugal
President of Singapore
President of Guyana
President of Trinidad & Tobacco.
Heti a nih laia Mizo dik tak, kan ram hruaitu hlun fanu ngei, Gorkali ( Indian citizen by birth, Mizorama pianga seilian, Mizo khawtlang nun leh leh kan sakhaw thila inphun nghet tak) pasala a neih mai avanga en hran kan tum ta riau mai hi chu kan ti lutuk deuh lo maw! Danin a phal anga inthlanna a chuh ve hi eng vanga ngai thei lo riau nge kan nih chu aw!