Aizawl West-II a ZPM candidate Lalnghinglova Hmar (Tetea Hmar) chuan social media-a criminal case a neih thu darh chungchangah case a neih chhan sawifiah.
Thawhlehnia Aizawl Press Club-a thu thar thehdarhtute an kawmnaah thubuai a neih chungchang The Zozam Times zawhna chhangin Lalnghinglova Hmar chuan, “Kum 2019 Lok Sabha MP inthlan dawna ka thawhna chanchinbuin party pakhat symbol an tihsual palh vanga thubuai hi nei ka ni. ‘An sual vang, an tihluih’ tiin thubuai ka neih phah,” a ti.
Tetea Hmar chuan a thawhna chanchinbuin party symbol an tihsual palh lai hian campaign a ngaih avangin chawlh a lak thu sawiin, “Inthlan niah polling booth pakhata ka awm laiin kei phei chuan ka hre ve chauh a ni,” tiin court thu kal lai a nih avangin thil zawng zawng sawi a rem loh thu a sawi.