Mizoram Pradesh Congress Committee (MPCC) chuan kum 2018 MLA inthlan dawna MNF-in an party manifesto zaa 80 tihlawhtling tawh anga an sawi chu thu belhchian dawl lo leh mipui rilru hruai kawi tumna a nih thu an sawi.
Thawhlehnia an party pisa-ah thu thar thehdarhtute kawmin MPCC Treasurer Dr Lalmalsawma Nghaka chuan, tun hnaia MNF Adviser leh Cabinet Minister Lalruatkima’n thu thar thehdarhtute a kawm tuma an party manifesto zaa 80 tihlawhtling tawh anga a insawi chu thu belhchian dawl lo leh mipui rilru hruai kawi tumna mai a nih thu a sawi.
Dr Lalmalsawma Nghaka chuan kum 2018 MLA inthlan dawna MNF flagship program, SEDP chu Mizorama chhungkaw zawng zawng, NLUP dawng tawhte pawh huam vekin chhung tinin Rs nuai 3 an dawn tur thu an sawi chu tun dinhmunah chhungkaw nuai khat leh sing hnihin dawng tawh anga chhut a nih thu a sawi.
“SEDP thawh khatnaah chhungkaw 60,000 hnenah Rs 50,000 theuh pek an ni tawh a. Chu chu Rs nuai 3 atanga chhut chuan zaa 16 chauhin an dawng tihna a ni a. A thawh hnihnaah chhungkaw 60,000 hnenah Rs 25,000 theuhin first instalment an pe a. Rs nuai 3 atanga chhutin zaa 8 velin an dawng ve hram,” a ti.
MNF party hian thalaite tan tiin eizawnna kawng zawnpuina a nih beiseia SEDP Board mak tak tak 14 an din tih a sawi a. Heng board hian thla tin Rs nuai 37 hman ralin kum khatah Rs nuai 444 khawhral anga chhut a ni a, SEDP Board-te hian eng hlawhtlinna nge an neih tih chu mipuite zawhna a nih thu a sawi bawk.
MPCC treasurer chuan MNF party hian healthcare hnuaiah Rs nuai 2 theuh chhungkaw tin tan an tiam laiin, Rs. 63.88 crore chu reimbursement damlo enkawlna an la pe thei lo va, an la batsak mek a. Mipuiin inbumna mai nia an ngaih avangin kumin 2023-24 chhung hian enrolment ringawt pawh zaa 32.75-in a tlahniam a. MNF sorkar hian Rs. vbc 1,000 lai Asian Development Bank atangin damlote hospital bill rulhna tur hi puk an la tum mek chauh bawk niin a sawi.
Chief minister-in Lengpui Airport siam thata, India rama airport cute ber pawla siam a tum chu Rs vbc 19.95 sen a ni chungin an sak that laiin a chim rup a. Aizawl chu traffic jam awm lohna khawpuiah siam tumna kawng chhawng leh PAHOSS chungchang pawh, deputy chief minister sawi danin 403 zingah 11 chiah hawn a la nih thu a sawi bawk.
MNF manifesto-a langsar tak, contract leh supply chungchangah pawh Kamrul leh Zoramchhana vulh chiam mai chu MNF sorkar hmalakna langsar a nih thu sawiin Dr Lalmalsawma Nghaka chuan, “Kamrul Laskar ringawt hian sorkar atangin contract Rs 11,643 crore a hmu nia hriat a ni,” a ti.
MPCC treasurer chuan Minister Robert Romawia chu office of profit thubuai a nei a. Party thenkhat phei chuan dan phal loh tiin governor hnenah disqualify turin lehkha an thehlut hial niin a sawi. MNF sorkarin a hmingin Lokayukta chu ha nei si lovin an dinin, Mizoram Lok Ayuta hian thubuai pahnihah CBI ko lut turin ti mah se, Mizoram sorkarin a ko lut duh lo niin a sawi.
Dr Lalmalsawma Nghaka chuan CM buaipui em em mai mai mau chungchang chu a hlawhtling tawk loh avangin tumah hian an sawi tha peih tawh lo va. Lengpui leh Hmunpui lama pilot project an tihte pawh a nursery leh a chi supply kaihhnawih vela hlawhtling tate chanchin chiang zawkin mipuiin hriat an châk thu a sawi bawk.