Aizawl : MNF party chuan Pathian leh mipuite duhsakna changin kumin MLA inthlanpui lo awm turah an sorkar leh ngei dawn niin an sawi.
Nimina thuchhuah an siamah MNF party chuan, an candidate zingah kohhran upa ni mek 12, Phd nei panga, medical doctor pakhat leh engineer degree nei pali leh rampun huap tlawmngai pawla hruaitu hlun lo ni tawh eng emaw zat an awm tih sawiin, “Sorkar tha leh chak din tura rin ngam thiau, eiru lo tura intiam ve ngai lo, eiruk tum reng reng lo vek an ni. Pathian leh mipuite duhsakna changin kan sorkar leh ngei beiseina sang tak kan nei,” an ti.
Sorkar term kal mekah khawvel pum hualin harsatnain a tlangbuak a, Mizoramah pawh harsatna bakah ran pul hri, lirnghing, kangmei chhuak, ramri buaina leh thenawm ram buaiin namen lovin a nuai a. He’ng harsatna kara sorkarna chang an nih thu leh, kohhran leh tlawmngai pawl nen theihtawp chhuahin Pathian au chunga paltlangin, he;ng kara hmasawnna tam tak kil tina hmuh theiha awmte avangin mipuite’n MNF sorkarah rintawkna neiin, MNF chuan sorkarna a chang leh ngei dawn niin an sawi.