MNF party a lo sawrkar chhoh hnu lawk 2019 ah khan Mizoram state health care scheme hnuaiah mizoram state health care society chu din a lo ni ta a. He society hnuaiah hian mipuite chu inziak lutin chhungkaw khatin Rs 2000 dahin an dam loh mangan hunah Rs 2,00,000 thleng an in enkawlna chu an bill leh thei dawn a ni tih a ni a. Mipui pawh an lawm a. Hriselna lam hawia sawrkar ke penna hi an fak hle a ni.
Amaherawhchu mipui lawmna hi a kal rei hman lo hle. Mipuiin an in enkawlna a taka an han bill meuh chuan pek chhuah an lo harsat ta hle mai si a. Mi tam takin he bill let leh tur hian an damdawiin awmna turte chu thenawm khawveng leh laina hnai hnen atangin an puk a. Damdawiin atangin an inkhul chhuak a. Mahse a pawisa tak an hmuh chu kum a liam hnuah te a ni ta a. Health care lamah englai pawhin pawisa a awm rih lo tih a ni reng ringawt a. Mipui pawisa thawhkhawm pawh chu hnathawktute hlawhah an lo hmang zo a. Chief minister in Assembly house-a a mamawh apiangin an va hman mai tur Rs 2,00,000 kan dah sa vek a ni a tih chu thu tak reng reng a lo ni lova. Health care society chuan sawrkar atangin pawisa an dawn loh chuan pek chhuah tur pawh an nei thei ta lo a. Chutih laiin sawrkar lam lah chu sum an harsa em em reng bawk si. A tawpa manganna tawk ta chu mipui kan lo ni ta. Health care society hian englai pawhin mipui pawisa cheng vaibelchhe 60 chuang a ba reng ang a ni. Mipui manganna chhawk tura duan scheme chu mipui ti mangangtu scheme ah a lo chang ta a. Heti em em a scheme hlawhchham hi a tam lo ang tih theih hial tur a ni ta.
Hei hi kan sawrkarin health care scheme a siam, a kalpui dan anih laiin inthlan kan hnaih a, party hrang hrangin election manifesto an han ti chhuak a. Ruling party MNF party manifesto tharah chuan “Mizoram state health care scheme hi ADB atanga funding hmanga changtlung zawk leh phuisui zawka kalpui a ni ang” an ti leh ta pawp mai a. Asian Development Bank atanga pawisa puk chawp tur, dil chawp tur hmangin mipui chu min han thlem a. Hlawhchham tawh hnuah thu awihawm deuha inbum leh tumna pawh a ang khawp mai. Innghahna tlak loh scheme min dinpui a. Min hlawhchham pui hnuah thu belhchian dawl lo hmangin min thlem leh a ni a. Mipuiin hetianga thlemna hi eng angin nge an chhan ang le? Mipui hian min bum tawh thintu hi kan hriselna chungchanga innghahna turin kan thlang tling leh dawn em le?