Bangladesh khawchhak lama rel pahnih insu-ah mi 17 vel an thi a, mi dang thahnem takin hliam an tuar bawk niin thuneituten an sawi.
Bungraw phur rel zawkin mihring phur rel hnung lam hi Thawhtanni chawhnu khan Dhaka hmarchhak lam km 80 vela hla, Bhairab-ah a su a ni.
Signal fel lo vanga insu a nih a rinawm ber niin railway thuneitu pakhat chuan BBC Bengali hnenah a sawi.
Bangladesh-ah hian rel insu leh chetsualna hi a hmanrua leh enkawlna that loh vangin thil thar a ni lem lo.
Jagannathpur rail crossing-a insutnaah hian mihring phurtu zawk, Egarsindhur Twilight an tiha chuang mi 14 chu a hmunah an thi nghal am a pindan pathum a let a, pahnih dang a chhe tel bawk.
“A chhungah mi eng emaw zat an tang a. Thi zinga tam ber hi a hmuna thin an ni,” tiin tual chhung fire service chief Mohammad Masud chuan thuthar lakhawmtute hnenah a sawi.
Damdawi inah mi 50 chuang enkawl niin an zinga pathum an thih belh a. Thi hi an pun rin a la ni a, chhanchhuah hna thawh mek zel a la ni tih Dhaka Railway Police Superintendent Anowar Hossain chuan thuthar lakhawmtute hnenah a sawi.
Tual chhunga sorkar hotu pakhat chuan rescue team an thlen hmain a bul hnaia chengten chhanchhuah hna hi an thawk zung zung niin BBC hnenah a sawi.
Hliam tuar an tam deuh avangin damdawi ina thawkte an indaih lo hle a, an bul hnai damdawi in danga thawktute chu pui tura tirh chhuah an ni.
Bangladeshi thuneitute chuan chhiatna thlen chhan chhui nghal a nih thu an sawi.
Signal pek sual bakah hiana kawng that loh vang te, rail crossing-a viltu that tawk loh vangtein a hma lam pawhin chetsualna a lo thleng fo tawh thin.
April khan Dhaka pan mihring phur rel leh bungraw phur rel chu Bhairab chhim lam, Comilla-ah insuin mi an thi nual a. Hei pawh hi signal pek sual vanga thleng nia ngaih a ni.