Lok Sabha inthlanpui lo awm turah Tripura-ah Congress leh Indigenous Nationalist Party of Twipra (INPT) chuan thawhhona thutlung siamin an tangho dawn.
Royal scion Pradyot Bikram Manikya Debbarma-a kaihhruai, Tripura Pradesh Congress Committee (TPCC) hian an state-a Tribal party lian leh hlun ber, INPT hi a tirah inremna siampui thei mai lo mah se an indawr fel thei a ni.
Thla tir khan hel thin, politics khel zui ta, INPT supremo Bijoy Kumar Hrangkhawl chuan tun hmain Congress hi an lo thawhpui tawh thin thu a sawi a, tun inthlan lo awm turah pawh an indawr thu a sawi a; mahse, an party-in an pawm theih loh thil an phut tel avangin an inbe rem lo tih a lo sawi tawh a ni.
TPCC President Pradyot Manikya pawhin social media-ah a sawi ve bawk a; mahse, an inbe fel thei ta a. TPCC president chuan, “INPT nen inremna kan siam thei ta a. Congress hian CAB kan thiat ang a, Forest Bill, ADC area-te tan Direct Funding kan ti leh ang a, Kok Borok chu Roman script-in kan dah ang a, TNV/ATTF accord pawh kan hmang ang,” a ti.