YMA inkhawmpui lian vawi 74-na chu nizan atang khan Biate khua Public Playground-a pandal an sak Zialung Rûn-ah neih tan a, vawiinah rorel inkhawm neih a ni ang.
Nizana palai lawm inkhawm hi Central YMA Treasurer Fabian Lalfakawma kaihhruaia neih a ni a, YMA chanchinbu Golden Jubilee Souvenir tlangzarh a ni a, Ramngaw leh Nungcha humhalh tha, Tuihna humhalh tha, Luidung humhalh tha leh YMA Chanchinbu la thate hnenah lawmman sem a ni.
Vawiin chawhma dar 11 atanga tlai dar 4 thleng rorel inkhawm neih a ni a, rorel tura chhawp chhuah, agenda zingah YMA khawih paruk leh sorkar khawih pahnih te a awm.
YMA khawihah hian environment humhalhna kawngah hian Central YMA-in tun aia chak zawkin hma la rawh se, tih te, hmun hrang hranga awm Zofate kan insuihkhawm leh zual theih nan tun aia chak zawkin Central YMA-in hma la rawh se tih te, social audit hi tha zawka kalpui a nih theih nan leh mipuiin kan hlawkpui theih nan hmalak ni rawh se tih te, YMA-ten sorkar department kan thawhhopuite hi zirchiana thawhpui âwm chauh thawhpui tawh nise tih te, environment clearance tel lo chuan Mizoram chhungah hmasawnna hnathawh a nih tawh loh nan Central YMA-in hma la rawh se tih leh Tuihna humhalh kawngah YMA-in uar zawk leh nasa zawk a hma lak ni rawh se tih rawtna te chu ngaihtuah tura chhawp chhuah te a ni.
Sorkar khawih ngaihtuah tura chhawp chhuahte hi – ‘Quality education a awm theih nan sorkarin tun aia chak zawkin hma la rawh se’ tih leh ‘Armed battalion pakhat tal Mizoram sorkarin din belh leh rawh se’ tihte a ni a. Kumpuan atan rawtna lut, ‘Ram leh Hnam Humhalh’ tih leh ‘Ruihhlo do’ tihte chu rorel palaiten an buk dawn a ni.
Ninganiah Central YMA hruaitu thar thlanna neih a ni dawn a, YMA Inkhawmpui Lian hi Ningani zanah a tiak ang.