Aizawl: Zoram People’s Movement (ZPM) hruaituten nimin khan Aizawl Press Club-ah thu thar thehdarhtute an kawm a, sorkarna an chan hunah infiamna lamah tih tak zetin an kalpui dawn a, hemi atan hian short term plan leh long term plan an nei niin an sawi.
ZPM hruaituten sorkarna an chan huna infiamna lama an ngaih pawimawh turte sawiin Aizawl West II ZPM candidate Lalnghinglova Hmar chuan, Mizoramah infiamnain nasa taka hma a sawn chu lawmawm a tih thu a sawi a. Hetih lai hian sports hmasawnna hi a kai rual tawk lo deuh nia an hriat thu sawiin, “Infrastructure lamah nasa takin kan thang a, infiam mite hian ngaihsak an hlawh tawk lo a, hei hi thlak kan tum,” a ti.
Kum 2019-2023 chhungin Mizoram State Sports Council hnuaiah project lian tham 108 an thawk thei chu a lawmawm rualin hetiang taka hna lian thawk chak thei an nih rual hian infiam mite dinhmun erawh a la hniam hle niin a sawi bawk.
Lalnghinglova Hmar chuan November, 2022-a Shillong-a Northeast Olympic Games-ah Mizoram chu hmarchhak state pariat zinga parukna a ni phak chauh chu infrastructure lam chauh ni lo, a infiamnaah tak hmasawn mamawhzia a tilang niin a sawi.
ZPM chuan infiamna kawnga hma sawn dawn chuan a hmunhma neih that a pawimawh rualin a buaipuitu sports association thuam chak a tul nia an hriat thu sawiin Lalnghinglova Hmar chuan, “Tunah hian sports association thenkhat chuan national competition-a an tel dawnin sum leh paiah harsatna an tawk nasa hle a, mi mal pawisa puk chawpte pawh an awm thin. Sorkar tan puih vek sen a ni lo chungin thuneihna kan chang a nih chuan sports association-in an dawn tur Sports Promotional Fund ennawn kan tum,” a ti.
Sports association-in anmahni puala hmunhma an neih an ngaih pawimawh tur thu sawiin, “A theih chin chinah state level recognised sports body-ten an duh leh mamawh huna an hman theih turin sorkar sports hmunhmate hi sports association-te nen a hman dan sawiho thin a ni ang,” tiin, an ngaihdan dah pawimawh a nih tur thu a sawi bawk.
September 6, 2022 atanga hman tan, The Mizoram Sports Incentive Award Scheme, 2022 hnuaiah Mizoram State Sports Council hnuaia recognised sports association ni ve thlap si, Sports Incentive Award pek ve lohte tan ruahmanna an siam dawn niin Lalnghinglova Hmar chuan a sawi.
Lalnghinglova Hmar chuan Mizoramah sports chawi san a nih dawn chuan zirtirtu neih that a pawimawh tih sawiin, ZPM an sorkar chuan Mizo coach awmte chu tun aia thuam thata training tha zawk leh zirna sang zawk an neih theihna turin hma an lak tur thu a sawi bawk.
Dr. Vanlalthlana’n zawhna a chhang
Aizawl North II ZPM candidate Dr Vanlalthlana chuan MNF sorkarin industry-a sports an puan chhan chu eng emaw chhuanlam atana an hman duh vang niin a sawi.
Thawhlehnia Aizawl Press Club-a thu thar thehdarhtute an kawmnaah, The Zozam Times zawhna chhangin Dr Vanlalthlana chuan, “Sports hi industry-ah an puang ringawt a, an la ngaihven zui lo va, hmalakna mumal a awm chuang lo va. Sports hi industry-a lo puan ve ringawt kha awmzia a nei lem lo va, inkungkaihna a awm lo,” a ti.
Aizawl North II ZPM official candidate Dr Vanlalthlana chuan industries department-in sports hi list of industries-ah an la dah lo nia a hriat thu leh department-te inrawn tawnna a awm lo nia a hriat thu a sawi a. “Sorkarin sports hi industry-a a puan chhan nia lang chu technical lamah anmahnia hna an thawh ve theihna tur ni berin a lang a. PWD kaltlang lova fund lo khawih ve theihna tur chhuanlam pakhatna atana an ruahmannaah ka ngai,” tiin, Sports department hian an project te, an thil tihte chu PWD-in a lo en a ngai a, PWD kaltlang a ngai a, tunah chuan anmahni leh anmahni hian project an siam a, an buaipui niin a sawi.
Dr Vanlalthlana chuan tuna PMJVK hnuaia hnate hi sports department-a an AE te, JE te emaw, SA te hian an thawk kual char char thei a nih loh chuan vil ngaihna a awm lo nia sawiin, “An buaipui ve tlat bawk sia a, ruahmanna felfai a awm lo. Tuna an kalphungah chuan sports hi industry-ah an puang ve tawp a, an ngaihven zui lo va, eng emaw atan chhuanlamah an la hmang mai mai a ni tih hi kan ngaihdan a ni,” a ti bawk.