Assam-a tun hnaia zu chhe in avanga thi chu mi 124 an tling tawh a, mi 331 chu damdawi inah enkawl mek an la ni bawk.
Jorhat Medical College Hospital (JMCH)-ah mi 71 thi tawhin mi 272 enkawl mek an nih thu Health Department thuneitute chuan an sawi a. Titabor Subdivision Hospital, Jorhat district-ah mi 4 an thi tawh bawk.
Golaghat district-ah mi 49 an thi tawh a, Golaghat Civil Hospital-ah mi 59 enkawl mek an la ni bawk a. Thi eng emaw zat chu damdawi in panpui hman lohva thi an ni bawk.
He thil hi Ningani zana Golaghat leh Jorhat district-a thingpui huana hnathawk thinten zu an in atanga intan a ni a, a zan hian mi 12 an thi nghal a ni.
Chief Minister Himanta Biswa Sarma leh health minister Sarma chuan Inrinni khan JMCH-a enkawl mek damlote an tlawh a. Sonowal hian thite chu zangnadawmna Rs. Nuai 2 theuh leh damlote pawh Rs 50,000 theuhva kan an nih tur thu a sawi a. Upper Assam Division Commissioner Julie Sonowal kaihhruaina hnuaiah chhui tura thu pein thla khat chhunga report siam hman turin a ti bawk.
Assam Director General of Police Kuladhar Saikia chuan he thil thleng avang hian Golaghat-ah mi 12 chu thu zawh fiah tura lak an nih tawh thu a sawi.
Dibrugarh district-a Assam Medical College Hospital, Gauhati Medical College Hospital leh Sonitpur district-a Tezpur Medical College Hospital-a doctor-te pawh Jorhat leh Golaghat damdawi ina doctor awmte pui tura tirh an nih tawh thu Sarma chuan a sawi.
Anni bakah hian Medical Education-a Director Anup Barman, National Rural Health Mission-a director-te pawh Jorhat-ah kala damlo enkawl hna vil reng turin minister hian tih an nih tawh thu a sawi bawk.
Damdawi in lam chuan damlo mek chhungte chu ei leh in lamah pawh fimkhura mi thiamten an hrilh ang chauh ei rih turin an ti bawk.
Tuna Assam-a thil thleng hi chawlhkar hnih emaw vel lek chhunga zu chhe in avanga mi an thih vak tum hnihna a ni ta a. Tun thla tur khan Uttar Pradesh leh Uttarakhand-ah mi 70 vel an lo thi tawh a ni.