Aizawl: MPCC Sr Vice President Lal Thanzara chuan BJP leh a thawhpui MNF vangin kohhran tam takin harsatna an tawh nasat thu a sawi.
Nilainia Aizawl North III huam chhung, Edenthar venga Congress campaign office hawn leh mi thar lawm luh inkhawm a hmanpuinaah Lal Thanzara chuan, BJP hian Mizote sakhaw ni serh leh ni pawimawh bawhchhe zawngin programme an siam zat zat a, Inthlan vote chhiar pawh Pathianniah an ruat leh ngat bawk tih sawiin, “BJP leh a thawhpui MNF vang hian kohhran tam takin harsatna an tawk nasa hle a. Pathian ram chanchin tha hrila harsa takzet,” tih sawiin, Pathianin a kohhran hote hmangin ram dinhmun a kawhhmuh hi a takin Mizoram mipuiin an hlenchhuah a ngai tih a sawi.
Lal Thanzara chuan, party thenkhatin cheng nuai thum tiamin BJP tanpuina campaign fund hmangin sorkarna an siam nia sawiin, “Kan sakhua leh kan hnam lungphum an sawinghing a, BJP nena an thawhhona pawh la chhu chat lo MNF party Mizoram mipuiin paihthlak hi tihmakmawh a ni,” a ti.
Aizawl North III biala INC candidate Lal Thanzara chuan, ZPM party pawhin an Leader hovin BJP kal kawng an sial sak tih sawiin, “Central BJP malsawmna dawngin Mizoram siam an tum thu an au pui a. Lunglei lamah pawh BJP chuan Congress kan thawhpui thei lo. MNF leh ZPM erawh kan thawhpui thei an ti hial a ni,” a ti bawk.