China chuan thla hnih lai vantlang zinga a inlan tawh loh hnuah an defence minister, Li Shangfu chu bân a ni tih an puang.
Bân a nih chhan hi engmah an sawi lo va, tunge a aiawhah dah a nih tih pawh an puang lo.
Bân a nih hi tun hnaia China-a sipai hotu lawk tak tak bân an nih chhunzawmna a ni a, bân tawh zingah Qin Gang pawh telin foreign minister atangin July khan bân a ni.
Qin leh Li te hi State Council-a an nihna hlihsak an ni tih an ram ministry chuan Thawhlehni khan a puang a ni.
China-a rorelna sang ber, National People’s Congress-a Standing Committee chuan an pahnih bân an nihna hi an pawm ve ve tih state broadcaster CCTV chuan a sawi.
China hian tun karah Beijing-ah ram dang defence hotute intawh khawm an thleng dawn a, defence minister nei lovin an an thlen a ngaih hmel ta hle a ni.
Reuters chuan thla hmasa khan hmasawnnahnathawh leh hmanraw leinaah ei ruk a nei nia hriat a nih avangin chhui mek a nih thu a tar lang.
Vantlang zinga a inlan hnuhnung ber chu August 29 kha niin African ramte nena Beijing-a venhimna lam sawihonaah ani a. Hemi hma pawh hian March thlaa a inlan bak kha a inlan lo.
Aerospace engineer, satellite leh rocket launch centre-a thawk thin, Gen Li hi sipai leh Chinese politics-ah a tahtawla kala hma sawn zel a ni.
Kum 2018 khan sipaia equipment development arm-ah hotu niin US sorkar pawhin China-in Russian combat aircraft leh ralthuam dang a lei avangin a hrek nghe nghe.
An hrekna avang hian Gen Li hian US Defence Secretary Lloyd Austin pawh kumin kumtira Singapore defence summit-ah a hmu duh lo a ni.
A nihna hlihsak tawh tho, Qin-a ang bawkin President Xi Jinping-a duhsak tak a ni ve tho bawk.
July khan Qin-a hi thla sarih chauh a ni hman tihin foreign minister atanga bân a ni.
Qin-a bân a nih chhan hi sawi a awm lo va; mahse, Wall Street Journal chuan United States-a hna a thawh laiin a nupui bak hmeichhe dang a lo kawp vang niin an tar lang.
Bân a nih hnuah hian nuclear ralthuam enkawltu hotu lawk pahnih chu thlak zui an ni a, sawi a hlawh phah hle a ni.
People’s Liberation Army (PLA) hnuaia Rocket Force unit hotu, General Li Yuchao leh a thachhangdawltu hi thla eng emaw zat ‘an hmel hmuh tur a awm loh’ hnuah bân an ni tih puan zui a ni.