Inter Milan in Champions League Group D inkhelah Austrian champion FC Salzburg an mikhual a, 2-1 in hnehna an chang.
Thawhlehni zana San Siro a inkhelah hian Inter Milan tan Alexis Sanchez chuan a club hlui a a kir leh hnua a goal hmasa ber a khung a. Minute 19-naah penalty area chhungah ball changin goal a khung.
Salzburg team naupang tak an zam mai lova, inkhel tan tirh atangin an tlan taima a, Inter player-ten ball an chanin an bawr nghal thuai zel.
Second half tan hnu lawkah Inter goalkeeper Yann Sommer hna siamsak fo tu Oscar Gloukh chuan an si phurh a sut a. Mahse Inter in hma hruai leh thuaiin minute 64-naah Davide Frattesi chuan penalty a hlawhchhuak a. Hakan Calhanoglu in goal-ah a chantir.
Inter coach Simone Inzaghi chuan, “Knockout stage atana tling turin kan hnehna chan hi a pawimawh hle. Team tha leh hlauhawm lakah chak phu in kan khel a, hmachhawn an awlsam dawn lo tih kan hre sa.” a ti a.
“Kan group ah hian kan intluk tlang hlawm viau a. Away inkhel vawi hnih kan hmachhawn dawn a, uluk taka kan inbuatsaih a ngai a. Champions League-ah chuan chetsual a thiang lo.” a ti bawk.
Inkhel dangah Spanish club Real Sociedad in Benfica an tlawh a, Estádio da Luz-ah 1-0 in hnehna an chang.
Team pahnihten first half-ah goal khung ve ve mahse offside avangin pawm a ni lo ve ve a. Second half-ah midfielder Brais Mendez chuan La Real tan goal a khung.
La Real hian goal difference a an san zawk avangin Inter Milan hi an lehpel a ni.