Mizoram Chief Electoral Officer Madhup Vyas chuan Mizoram state assembly inthlanpui atan ruahmanna peih fel thawkhat a nih tawh thu a sawi.
Nimina thu thar thehdarhtute a kawmnaah CEO chuan Mizoram inthlanpui vote chhiar hun sawn dil chungchangah Election Commission of India (ECI) hnen atangin thu thar an la hriat loh thu a sawi.
State pumah model code of conduct khauh taka kenkawh a nih thu sawiin Vyas chuan, “Sorkar hmalakna bikah department kaihhnawihten chief secretary kaihhruai Model Code of Conduct Screening Committee-ah dilna an thlen zel a, hemi piah lamah hian commission ngaihtuah zui tura thlen pahnih khat a awm,” a ti.
Mizoram CEO-in a tar lan danin Mizoram pumah mipa voter 4,13,062 awmin, hmeichhe voter 4,39,026 an awm a. Service voter 4,975 awm bawkin Mizoram puma vote nei zat chu 8,57,063 an ni a. Vote thlakna tur polling station 1,276-te ECI hriattir ni tawh niin heng zinga 765-ahte vote thlak lai webcasting ti tura ruahmanna siam a ni a. Hei hian Mizorama polling station awm zinga zaa 60 a tling pha a ni.
Postal ballot hmanga vote thlak thei category pali awmin; kum 80 chung lam, vohbik (PwD) benchmark disability certificate nei te, vote thlak nia essential services hrang hrang duty leh inthlan buaipuia duty-te an ni a. RO theuhten dilna form pe chhuakin dilna eng emaw zat a lut tawh a ni.
Service voter 4,975-te tan Electronically Transmitted Postal Ballot Management System (ETPBMS) kaltlangin e-Postal Ballot thawn chhuah fel a ni tawh bawk.
Mizorama assembly constituency 40-ah in lama vote thlak ‘home voting’ thei turin kum 80 chung lam leh vohbik, an vaiin mi 2,092 an awm a.
Vote thlak nia inthlan buaipui tur polling party 1,470, presiding officer, first, second leh third polling officer-te tan District Election Officer-te ruahmannain training thawh khatna an zo fel a, training thawh hnihna district thenkhatah kalpui mek a ni a. Tun dinhmunah inthlan duty tur indaih lohna a awm lo.
Venhimna chungchangah state police personnel 3,000 bakah Central Armed Police Forces (CAPF) section 450 rawih tura ruahman atangin BSF company 10, CRPF leh SSB company nga ve ve ten Mizoram an thleng tawh a. Vote thlak nia hman theih turin Pawan Hans Helicopter pakhat, Mualpui Helipad-ah zing dar 7 atanga tlai dar 4 thleng duty tura ruahman a ni bawk.