Aizawl: MNF chuan ZPM chief ministerial candidate leh Serchhip bialtu MLA ni bawk, Lalduhoma chu a MLA fund hmanga damlo kan nan sum chheprelhah an puh.
MNF Media & Publicity department chuan nimin khan Aizawl Press Club-ah thu thar thehdarhtute an kawm a, an General Secretary VL Krosshnehzova chuan Lalduhoma hian kum 2021-2022 chhung MLA fund atangin dam lo kan nan Rs 16,42,000 a hmang nia sawi awm chu an chhui zui a, thil dik lo inphum a lo awm ngei tih an hre chhuak tih a sawi.
Lalduhoma fund hmanna, Lalthanmawia Hauzel, New Sechhip-in RTI hmanga dilna chhannaa December 22, 2022-a a lan danin, Serchhip bialtu MLA hian Zoremsangi, Serchhip Dinthar chu ‘Grant in aid for Health Purpose’ atan Rs 2,50,000 a pe angin a inziak tih sawiin, “A takah erawh Lalduhoma hian Zoramsangi hnenah damlo kanna Rs 1000 chiah a pe a, pawisa emaw, a hriselna enkawlna tur emaw engmah dang pek a nei lo a. He thu hi Pi Zoremsangi pasal, Pu H Zoramsiama pawhin nemnghetin, Pu Lalduhoma hian Pi Zoremsangi hi Rs 1,000 bak a pek loh thu a sawi. Pi Zoremsangi pawhin Serchhip MNF hruaitute hnenah Pu Duhoma hian Rs. 2,50,000 a pek loh thu hi a sawi bawk,” a ti.
VL Krosshnehzova chuan Zoremsangi pasal, H. Zoramsiama hi Serchhip Dinthar, ZPM Village Council President ni lai a nih thu a sawi a. Zoremsangi hi tunah chuan a hriselna te pawh a lo tha ta tih sawiin, an lawmpui thu a sawi.
ZPM Chief Ministerial Candidate Lalduhoma’n a biala damlo a kanna tur Rs 2,49,000 a tham thensak duh mai chu mak an tih thu VL Krosshnehzova hian sawiin, “MLA zin loh bill a lak, mipuiin a eiruk kan hriatchhuah tak avanga a kir leh ang khan, he damlo kanna sum a lo chheprelh hi a dam lo kan tur hneh pe pe vat turin kan ngen a ni,” a ti.
MNF Media & Publicity dept GS chuan Lalduhoma chu a bial mipuite dawt a hrilh tam em avangin a bialah a awm ngam tawh mang lo tih a sawi a. Tun inthlan hnai tawh takah pawh hian a bial a thutchilh ngam lovin a tlawh zeuh zeuh chauh a. Serchhip bial ZPM hote chu arpui no hruai, a pui muin a laksak ang maiin an chavai hle niin a sawi.