- Ruata
Renault Duster chu thlaleh 29 hian Portugal-ah an tlangzarh dawn a, India ramah chuan kum 2025-ah lei theih tura an tlangzarh hman beisei a ni.
Dacia Duster, India ram leh hmun thenkhata Renault Duster anga chhuak thin hi lirthei model hlawhtling tak niin India ramah pawh an hralh tam viau mai a. Mizoramah ngei pawh SUV lei hlawh ber te zinga mi a ni. Renault chuan kum 2022 khan India ram market-ah an titawp a, tunah hian an company chuan Kwid, Triber leh Kiger te an tichhuak mek a. Heng model te pawh hi kan state chhung leh ram pum huap pawhin an hralh tam hle a ni.
Renault chuan Duster hi titawp mahse tihtawp hlen an tum tihna a ni lo a. Generation thar model mawi tak tichhuak turin tunah hian an inpuahchah mek a ni a. Design leh kentel hrang hrangah pawh thil thar tha leh mawi tak tak kan hmu dawn a ni.
Report hrang hrangin an tarlan danin Duster thar tur hi thutna tlar thumin an duan tawh hmel a. A design leh styling-ah hian Bigster model a pawl dawn hle a, tlemin a hma aiin a tung deuh ang a, mawi erawh a mawi viau dawn a ni. Grille thar, LED headlamp, fender design thar, bumper thar leh aluminium skid plate thar te kan hmu ang a, a hnung bumper, taillamp design thar leh c-pillar mounted door handle te a hnung lamah hian kan hmu dawn a ni.
A chhunglam pawh hi design leh kentel hrang hrangah a danglam nasa dawn hle a, hmanraw changkang ber bera thuam a ni dawn a ni. Touchscreen infotainment system thar smartphone connectivity leh digital instrument cluster thar ber ber nena thuam a nei ang a. Duster thar hi a hma aiin a chhung pawh a zau nuam viau tura beisei a ni.
Khawvel market danga chhuak model bikah chuan new-generation Renault Duster hian petrol khawl pathum 1.0L turbo petrol, 1.2L petrol hybrid leh 1.3L turbo petrol engine, a indawt danin 120bhp, 140bhp, leh 170bhp power pechhuak thei te a nei a. 170bhp power pechhuak thei 1.3L engine hian a variant sang leh man to hoah a awm dawn a, hei Duster tihchhuah tawh zawng zawnga chak ber a ni dawn a ni. India ramah hian eng khawl nen nge an rawn tihchhuah dawn sawi chian theih la ni lo mahse khing khawl tarlan ho tho khi a nih ve mai hmel a, hrechiang tur chuan kan la ngaihchan a ngai dawn a ni.
Kan sawi fo tawh angin India ramah hian SUV hralh a kal chho hle a. Renault Duster pawh hi India ramin SUV a neih zinga lei hlawh leh tha pawl tak a ni a. An han titawp ta mai hi ui tu pawh an tam viau a ni. Hmel thar leh thil thar tam tak nena a lo chhuak leh tur erawh thil lawmawm tak a ni a, he lirthei ngaina tute tan chuan thu lawmawm tak a ni a, nghah hret erawh a la ngai dawn a ni.