Mizoram inthlanpui lo awm tura inpuahchahna zelah nimin khan Chief Electoral Office, Mizoram buatsaihin media-te tan ICT Conference Hall-ah ‘One Day Sensitization Workshop’ buatsaih a ni.
Kaihruaitu Addl. Chief Electoral Officer H.Lianzela chuan Election Commission of India-in media a ngaihpawimawh thu leh ECI hnuaiah chak taka media lam kaihhnawih kalpui a nih thu a sawi a. Media platform hrang hrang kaltlanga voter awareness kalpui chu ECI duhdan chu chanchinbumite tel lo chuan a harsat thu a sawi a. Kalkhawmte chu vote thlak thatna State, inthlanna muanawm, felfai leh dik siam tura theihtawp chhuahpuiah a sawm.
H Lianzela chuan democracy ram inghahna lungphum 4-na, media-te chu tan lam nei lo tur leh thu dik leh finfiahte chauh puangzar thin turin kalkhawmte a chah a. October 26 – November 6, 2023 thlengin mipui zirtir kawnga ni tin chhuak chanchinbute inelna CEO Office-in a buatsaih dawn thu a sawi. November 6 -7, 2023-ah editorial kaltlangin politics rawng kai lo vote thlak tura mipui zirtirna thailang turin a ngen bawk.
Dr. Lallawmkima, IPRO (Media/Social-media related issues), Vanlalringa, Sr. Informatics Officer (cVIGIL/KYC & Helpline apps), H.Vanlalruatfeli, Programmer, CEO Office (Suvidha & Candidate apps) leh Zonun Sanga, Addl. SP, CID Crime (Offences related to media during elections) ten zirtirna an pe.