Taiwan mipuite chuan an ramah neih inang inneih (same-sex marriage) phal leh phal loh thutlukna siam nan Inrinni khan vote an thlak a, an inneih phalsak an ni dawn ta lo.
Taiwan mipuite hian ‘inneihna chu mipa leh hmeichhe inkar chauh tur a ni’ tiin thutlukna an siam ta a ni ber a. Nikum khan an ram high court chuan neih inang thlawp lam (same-sex union)-te duh angin thuremna a tichhuak tawh a, sorkarin dan anga kalpui turin rorelna khawl lamah ngaihtuah a ni a, inhnialna a nasat em avangin hetiang hian mipuite ngaihdan lain vote an thlak ta a ni.
Duh fir zualte chuan an ram roreltute hi inneihna chu hmeichhia leh mipa inkar ngei ti turin an nawr na hle thin a. Hei hi an ram mipuiin dan an hman Civil Code a nih thu pawh an aupui nasa thin a. An duh ang ngeiin hei hi thlak a ni dawn ta lo va; hetih lai hian LGBT activist-te erawh chuan inneihna dan an neih lai chu ennawna siam thaa neih inang inneih phalsakna pawh tel turin an nawr ve thung a ni.
Hetih rual hian sorkar chuan tun tuma ngaihdan sawina vote thlak (referendum) an neih hian nikum lama court-in thutlukna a lo siam tawh chu a tidanglamdawn chuang lo tih an sawi lawk a. Thuneitute chuan special law an pass ang a, chutah chuan Civil Code an siam tha (amend) dawn chuang lo a ni.
Hetih rual hian neih inang inneih phalsak duh lotute chuan rorel khawlte hian dan hi an khawih danglam tho an hlau hle a. An siam danglama thil awm thei chu neih inang inneite hi dan hnuaiah humhimna pek an ni ang a, dan anga an inneih erawh phalsak si lohva an tih theih a awm theih dawn a ni.