Meghalaya-in khawvel hriat a hlawh chhan pakhat, East Khasi Hills district-a living root bridge tia an sawi, thing zung upa tak, a inphan kual an zawh thin chu a kum a tam ve tawh avang leh tlawhtu an tam em avangin a dinhmun a derthawng mek a. A bul hnaia khua, Nohwet-a chengte chuan an khaw tilartu leh thil hlu tak hi a riral mai loh nan tun lai hian a khuaa tangrualin beihpui an thlak mek.
Kum 200 dawna upa ni tawh, root bridge hi a zawhtuten zawh a awlsam nan tiin a bulah lung lian pui pui an dah khawm thin a. Hun lo kal zelah heng lungte hian an lei hi a tichhe tan mek ta thung a, a insiam nan kum sawmbi tam tak a ngai si a, chhan tumin a khuain an thawk chhuak ta a ni.
Nohwet khaw hotu (headman) Bose Swell Khongthohrem leh a khuaa mite chuan Inrinni kal ta atang khan heng lungte hi hnatlangin an dah sawn a, an thawk chhunzawm mek bawk.
Meghalaya Basin Development Agency chuan, “Heng root bridge bula lamkhuang kung ro tawhtea lei kaite hi thing zung hian an ngei em em niin khuaa mite hian an ngai a. Chutiang chu a tlawhtuten lung an tiankhawm avang hian a tlem tial tial a, hei hi chhan an tum chhan a ni,” a ti.
Heng root bridge hi areca nut an ni a, an zing hi pawn lamah uai chhuakin a inphan kual nasa hle a. Hei hi miten leilawn zawh ang deuh hian an zawh thin a. Mahse, a zawhtuten kai awlsam nana an tih chu a chhiatpui mek si a ni.
Chhan tuma hnatlangte hian a bulah hian ‘Ficus elastica’ an tih, rubber chi khat kung an phun belh teuh bawk a. Hetiang thing hi root bridge-te tana kum tam tak hnua la tha tur niin an ngai a ni.
Khasi mite hian lei dawhna tur an neih that loh avangin lui kân ngaihna laiah hian rubber hi an phun thin a. Hun rei tak a liam hnuah chuan a zingte chu lei ang maia zawh theih a lo ni ta thin a. Chutiang avanga living root bridge an tihte pawh hi lo awm a ni a, tunah chuan khawvel pumah hriat hlawh a ni mek tawh a ni.