Tripura-a BJP-IPFT kaihhruai sorkar chuan Ministry of External Affairs (MEA) hnenah an ramah khualzinte awlsam zawka an luh zung zung theih nan, Bangladesh ram chhunga Comilla emaw, Brahmanbariya district-ah emaw visa office hawng turin a ngen dawn.
Tripura assembly thlasik session neih meka a tan ni, Zirtawpni kalta khan BJP MLA Binay Bhushan Das chuan ramri hnaiha sorkar laipuiin visa siam theihna tur office hawn theih nana lehkha thawn ni se tih private member resolution a pu lut a. He thu hi sawiho a nih hnuah pawm niin thenawm ramah hian Indian visa office hawn a nih theih nan lehkha an thawn dawn tih Chief Minister Dr. Manik Saha chuan a sawi a ni.
A resolution put luh a sawinaah Das chuan an state chuan tlang mawi tak, lui leh hmun dang, khualzin hip thei tur a ngah tih a sawi a. Buddhist hmun hlui chhe tawh leh monastery te, Tripura Sundari Temple, botanical garden, lung khawkrawk leh Unakoti leh hmun danga tlang mawi takte chu khualzin hiptu a nih thu leh hengte hi sorkar hmasain a ngaihthah thu a sawi.
“Bangladesh atanga khualzin lo kal tam ber hi Comilla leh Brahmanbariya district-a mite an ni a, anni hian visa nei turin hmun dang an pan hmasak a ngai thin a, chutiang a nih tawh loh nan an awmhmunah an tihna tur siam a ngai,” a ti.
Assembly-in a pass ang hian chief minister pawhin MEA hnenah lehkha thawna umzui ngei a nih tur thu a sawi nghal a ni.
Resolution pass tak hi tourism minister hlui leh CPI(M) MLA Ratan Bhowmik pawhin a thlawp.
An state chu kum 2017 chhunga hmarchhak state zinga ram dang mi khualzin tlawhtu ngah ber a nih thu a sawi a. Ram dang mi tlawhtu tam ber hi Bangladesh atanga lut an nih thu leh awlsam taka visa an neih theih chu an tlawhtu an ngah lehzual theihna tur a ni tih sawiin, sum lakluhna tha tak a ni thei bawk tih a sawi.