YMA Inkhawmpui Lian vawi 74-na, Biate khuaa neih mekah nimin khan rorel inkhawm neih a ni a, hmun hrang hranga awm Zofate inpumkhat leh zual theih nan tun aia chak zawkin hmalak an rel.
Rorel inkhawm hi Biate Public Playground-a Zialung Rûn-ah neih a ni a, hetah hian agenda lut zinga YMA khawih parukte chu pawm vek a ni a, chungte chu – ‘Hmun hrang hranga awm Zofate kan inpumkhat leh zual theih nan tun aia chak zawkin Central YMA in hma la rawh se’ tih te, ‘Environment humhalhna kawngah hian Central YMA-in tun aia chak zawkin hma la rawh se’ tih te, ‘Social audit hi tha zawka kalpui a nih theih nan leh mipuiin kan hlawkpui theih nan hmalak ni rawh se’ tih te, ‘YMA-ten sorkar dept kan thawhhopuite zirchiana thawhpui awm chauh thawhpui tawh ni se’ tih te, ‘Environment clearance tel lo chuan Mizoram chhungah hmasawnna hnathawh a nih tawh loh nan Central YMA-in hma la rawh se’ tih leh ‘Tuihna humhalh kawngah YMA-in uar zawk leh nasa zawka hma lak ni rawh se’ tih te a ni.
Heng bakah hian sorkar khawih, ‘Quality education a awm theih nan sorkarin tun aia chak zawkin hma la rawh se’ tih chu pawm a ni bawk.
Kumpuan rawtna lut pahnih zingah ‘Ram leh hnam humhalh’ tih an thlang a, YMA Inkhawmpui Lian vawi 75-na thleng turin Joint YMA Sakawrdai thlan a ni a, inkhawmpui lian neih lehna tur chu Sakawrdaiah a ni dawn a ni.
Rorel inkhawm neih a nih chhung hian Zialung Community Hall-ah variety programme hman a ni a. Zai, lemchan, hnam lâm leh intihlimna chi hrang hrang entir a nih bakah thupui pahnih, ‘Tuihna humhalh’ leh ‘Luidung humhalh chungchang’ thupui zir ho a ni a, vawiinah Central YMA hruaitu thar tur thlan a ni ang.