Thla thar a neih tur khawvela mixed martial arts ngainatute nghahhlelh UFC 295 a main event tur a thleng thei dawn lova. UFC heavyweight champion Jon Jones chu a inhliam avangin zai a ngai dawn.
UFC 295 hi November 12 hian New York-ah neih a ni dawn a, hetah hian UFC heavyweight title inchuhnaah Jones leh vawi hnih champion tawh Stipe Miocic te intum tura tih an ni.
Nimahsela UFC president Dana White chuan Jones chu Thawhtanni a training a neihnaah a inhliam a, a hliam hi zai a ngaih dawn avangin thla riat vel tal a chawlh a ngai dawn tih a sawi chiang.
Madison Square Garden a UFC 295 neih turah hian chelhtu awm lo lightheavyweight title inchuh tur Jiri Procházka leh middleweight champion hlui Alex Pereira te intum tur chu main event a ni tawh ang.
Co-main event-ah Tom Aspinall leh Sergei Pavlovich te intum tur chu sawn a ni a. Anni hian interim heavyweight title an inchuh dawn a ni.
Jones a inlan dawn loh avangin a khingpui tur Miocic pawh a inlan dawn lo tihna a ni a. Khingpui dang a nei dawn lo.
UFC hian kumthar lamah UFC a heavyweight fighter hlawhtling ber Miocic leh MMA fighter ropui bera tam takin an chhal Jones te hi la intum tir an tum tho nia sawi a ni bawk.