Aizawl: Mizoram Legislative Assembly inthlan neih tura ZPM party candidate-te chu ZPM Val Upa Council-in rinawmna thu an tiamtir.
ZPM candidate-te thu tiamtirna hun hi Thawhlehni zan khan Dawrpui Multipurpose Centre-ah neih a ni a, rinawmna thu tiamtirtu, Val Upa Council Chairman Lalfakzuala chuan candidate thutiamtute hian VUC hmaah thu an tiam mai a ni lova, ram mipui hmaah rinawmna thu an tiam avangin a pawimawh takzet tih a sawi a, tun tumah hian mi 31-in hming an ziak phawt tih te, chhim lama candidate mi pakua, campaign leh tul dang avanga inlan thei lote pawh hun hranah rinawmna thutiam an neihtir ve leh dawn tih a sawi.
ZPM candidate-te hian an thutiam lehkhaa ziakah chuan hming an ziah hnan vek a, thutiam hi point riatah then a ni a, chungte chu – ‘ZPM-in Kalphung thar mipui sorkar, ram leh hnam damna, langtlang leh hlemhletna laka fihlim sawrkar siam a tum a; chuvangin, candidate ka nih lai leh MLA ka nih hunah pawh ZPM thuthlung te, election manifesto leh vawiina rinawmna thutiam hi ka vuan tlat ang,’ tih te, ‘Candidate an nih laiin MPF kaihhruaina leh ECI Model Code of Conduct ka zawm ang,’ tih te, ‘MLA-ah thlan tlin an nih chuan a chunga thuneitute thu chu engkimah zawm an tum thu te, a dinhmun atana an ruat apiang pawmin a mawhphurna chu rinawm takin a hlen zel dawn tih te, chhungkhat laina leh mi dangte, tute pawh duhsakna bik lakah ka inthiarfihlim ang tih te, pawl dang nena thawhho leh inzawm chungchangah te, nihna leh dinhmun chungchangah te ZPM thuneitute thutlukna apiang ka pawm ang tih te, eng dinhmunah pawh ding ila, danin hamthatna min pek chhungah ka nung ang a, ka dinhmun avanga hamthatna siamchawp theih thil dang reng rengah ka inhnamhnawih lo ang tih te, an rinawmna thutiam chu hriat dan inang lo a awm palh a nih chuan Val Upa Council hrilhfiahna an pawm tur thu te-in an intiam a ni.
He hunah hian ZPM President Lalliansawta’n candidate-te mipui hmaa inhmelhriattirna hun a hmang a. Bualhranga, VUC member chuan fuihna thu sawiin Leader Lalduhoma pawhin thusawina hun a hmang bawk.