Mizoram Cooperative Apex Bank branch thar, Ramhlun Venglaia mi chu nimin khan Apex Bank Chairman Lalnunsanga’n a hawng.
Branch thar hawnna inkhawm hi Mizoram Cooperative Apex Bank Board of Director R Lalrempuia’n a kaihruai a, branch thar hawngtu, Lalnunsanga chuan branch thar chu Ramhlun Venglai mipui bakah a chhehvel a awmten tangkai taka an hman a beisei thu sawiin Mizo mipuite rawngbawl tura hmasawn zel an tum thu a sawi a. Apex Bank chu Mizote bank, a hlawkna pawh Mizoram chhungah chauh hman a nih hriaa Mizo hnam rilru pua mipuiten kan dawr a pawimawh thu a sawi a ni.
Apex Bank hian tun hnaiah kawng hrang hrangah hmasawnna neiin, kum 10 chuang zet chu an hlep pawh kum tin a thang chho zel a. Nikum 2022-23 chhung khan Rs. vaibelchhe 39.66 an hlep a, Credit Deposit Ratio 75.39 niin, CRAR pawh 25.19 a ni.