Aizawl : BJP Mizoram President Vanlalhmuaka chuan Dampa bial chhungah campaign nei mekin, an party general secretary Malsawmtluanga pawhin Hachhek bial khaw hrang hrang a tlawh mek a, he’ng bialah te hian BJP an tlin ngei an beisei thu an sawi.
BJP Mizoram President Vanlalhmuaka chuan a bial chhung Dampa khaw hrang hrangah BJP-in hmasawnna nei zelin, Dampa bial mipui te zarah a tlin ngei a rin thu a sawi a. Dampa bial chhungah hmasawnna chi hrang hrang sorkar tawh te’n an tih thuanawp tam tak te chu function thei a siam anih tur thu a sawi.
Vanlalhmuaka chuan Dampa bial a inkalpawhna kawng tha lo te leh kawng zim lutuk te chu siam that a tih zauh anih tur thu te, mipui eizawnna pawimawh feh kawng thalo te pawh siam that anih tur thu te, zirna in tih hmasawn a, Aizawl pan ngai lova hriselna kawnga hmanrua changtlung zawk kawng tam taka an chhawr theih tur siam anih tur thu te a sawi.
Dampa bialah BJP in hma a sawn zel tih sawiin, “BJP MLA nei ngei turin kan inbeisei bawk,” Vanlalhmuaka’n a ti.
Hachhek Bial BJP Official Candidate Malsawmtluanga, BJP State General Secretary pawhin a bial khaw hrang hrang tlawhin, he biala thlan tlin a nih chuan Mizoram thar kuhvaa buaina chinfel a nih tur thu a sawi.
Malsawmtluanga chuan central scheme hrang hrangte BJP sorkarna state lo ah chuan a nihna anga hman theih a nih loh thu avangin, PM Scheme hrang hrangte bakah Mizoramin a la hmuh ngailoh tamtak he scheme kaltlanga hamthatna an hmu thei dawn niin a sawi a. Heng bakah hian Tribal affairs atangin Eklavya School te leh damdawi in tha te chu central hruaitu te nen uluk takin an sawi ho tawh tih sawiin, Hachhek bial mipui ten an thlan tlin chuan a hlawhtlinna an hmu dawn niin a sawi bawk.
BJP Official candidate hrang hrang te hi Union Minister of State for Minority Affairs Jobn Barla, Union Minister Of Earth Science changtu Kiren Rijiju te, Nagaland Deputy CM, Mizoram Election Co-Incharge ni bawk Y Patton-te’n an campaign pui mek a. October 28, 2023 hian BJP National President JP Nadda chu BJP Election Manifesto tlangzarh turin Mizoram a rawn tlawh dawn bawk.