Aizawl: North East Congress Co-ordination Committee (NECCC) hruaituten nimin khan Aizawl Press club-ah thu thar thehdarhtute an kawm a, BJP-in India hmarchhak mipuite bumna policy kalpui mekin mipuite thendarha an chunga rorel tumin kawngkhar hnung lamah rukru angin rawn luh an tum mek niin an sawi.
NECCC Convener Pradyut Bordoloi chuan hmarchhakah tualto party-te hmangin thiam takin luh an tum mek tih sawiin, “Regional party-te hi lirthei khalhtu ang maiin an hmang a, an hnungah a rukin passenger angin an chuang a, an duh duhnaah an kalpui thin a ni. MNF pawh hi chutiang atan chuan an hmang mek a ni,” a ti.
Prime Minister Narendra Modi-a’n Manipur buaina kha a ngaihthah lui tlat tih sawiin Bordoloi chuan, “Ni 177 lai a ni tawh; mahse, Manipur mipuite thlamuan turin tlawh pawh a la tlawh lo a, anmahni tanpui turin pen pawh a la penchhuak lo. An tuarna te, an hliam te tidam turin a ngaihsakna pawh a lantir lo. A tih awmchhun chu parliament pawnah second 66 chhung chauh thu a sawi kha a ni,” tiin, Mizoramah pawh MNF sorkar mek lai hian BJP hian inthenhran tumna policy an chhawm nung mek zawk a. BJP hian tualto party tinte hi an hmatawngah an ngaih thu a sawi.
NECCC-in Mizote leh Zo hnahthlakte inpumkhatna a ngaih pawimawh a. Chutiang tur chuan mipuite hian vote thlak se an duh tih sawiin, “Keini chuan ‘Tang Puihna’ hi kan thlawp a, kalpui turin theihtawp kan chhuah dawn a ni,” Bordoloi hian a ti bawk.
Zawhna chhangin Assam MP chuan Mizoram Lok Sabha MP-in Manipur buaina chungchang sawiho tura an nawr lai khan tawngkam khat pawh a chhakchhuak lo va, anni chuan hmarchhak mipuite phatsanna nasa takah an ngaih thu a sawi.
NECCC Convener Bordoloi hi Arunachal Pradesh Chief Minister hlui, Nabam Tuki-a’n a tawiawm a ni.