ZPM PAC member leh Aizawl West I ZPM official candidate ni bawk, TBC Lalvenchhunga chuan Covid vanga sum harsatna chhuanlama SASCI sum puk hmangin MNF party chu an party mite induhsakna leh campaign nan an hmang niin a sawi.
Nimina Aizawl Press Club-a thu thar thehdarhtute a kawmnaah TBC Lalvenchhunga chuan Mizoram sorkarin kum thum chhungin Rs vbc 993.1976 chu rulh leh turin a puk tawh tih sawiin, “SASCI hi Covid leng avanga sum indaih lohna phuhruk nana hmasawnna ruhrel dinna atan, nakin hnua sum thawkchhuak leh thei tur atana central sorkarin India ram state tinte tana a duan a ni a. A duh tana puk theih a, a duh lo tana puk loh theih a ni,” tia sawiin, state thenkhat phei chuan an puk duh lo niin a sawi.
SASCI sum la vete pawhin Covid chhuanlam a reh rualin puk belh tawh loh laiin Mizoram chuan a theih chhung puk a tum tih sawiin, “Hetih mek lai hian Mizoramin sum harsatna leh leiba neih tam thute chu, Covid chhuanlama hmang zelin campaign au hla berah an la hmang zel,” a ti.
Covid vanga harsatna tawh a nih lai leh mipui healthcare bill leh SEDP pawh MNF sorkarin a pek theih loh laiin Kamrula bill a tang lo a, Abu Mazumdar a buhfai supply to bik pawh bill a tan ngai loh thu a sawi a. Mipuite hian finance minister thiam lo ber leh kai peng thiam ber hi vote an ba lo tih a sawi.
Covid hi chhuanlam chi a ni tawh lo tih sawiin 2021-22 thleng chuan a la nghawng a, 2023-24-ah eng state mahin chhuanlam atan an hmang tawh lo va. Union Finance Minister Sitharaman pawhin a thu sawinaah a sawi lang ngai tawh lo tih a sawi bawk.
Mizoramin Covid vanga sum dawn kim loh, Rs vbc 2,636.52 a nei tia chhuanlam siam thin mah se, kum 2019-20 atanga 2022-23 thlenga state budget hmuh tur beisei aia tam a hmuh belh zat chu Rs vbc 2563.17 a ni a. Covid chhuanlama sum hmuh loh an sawi ziah Rs vbc 2,636.52 leh an dawn belh zat inthlauhna chu Rs vbc 73.35 a nih thu TBC Lalvenchhunga chuan, “Covid chhuanlama Rs vbc 1,500 vel zet an puk belh mek chung pawh a, sum indaih lohna nasa tak Mizoramin kan tawk hi sum enkawl thiam loh vang liau liau a ni,” a ti.