Aizawl District Election Officer, Bawrhsap Nazuk Kumar leh Expenditure Observer Nayanjyothi Nath ten MLA inthlan lo awm tur chungchangah Aizawl district chhunga bank hrang hrang hotute kawmin, candidate te bank account vil uluk turin an chah.
MLA inthlanah Candidate ten campaign na atana sum hman theih chin an neih avang leh felfai leh thianghlim taka inthlan kalpui a nih theih nan candidate te hausakna leh an sum neih zat zawng zawng puan a ni thin a. Account an neihna bank te chu candidate te sum che vel lo thlithlai tura tih an ni.
Aizawl DEO Nazuk Kumar chuan Mizoram chu khawtlang nun a felfaiin, inthlanna kalphung pawh hahdamthlak viau mahse, mawhphurhna chelhtu ten inthlahdah lova an tih tur chin theuh uluk taka an hlen a pawimawh thu a sawi a. Expenditure Observer Nayanjyothi Nath pawhin banker te chu fimkhur taka candidate te account vil tura chahin, nitin report pek tur a nih thu te, sum tam tham lut leh chhuak te state pawn atanga transaction tam tham lut leh thil dang rinhlelhawm awm thei te uluk taka vil reng a pawimawh thu a sawi.
He thutkhawmah hian bank hrang hrang aiawhte bakah Income Tax, Police leh a kaihhnawih sorkar department aiawhte an tel a ni.