Congress chuan chawlhkar khat awh tur, ‘Jan Jagran Abhiyan’ chu November 14 atang hian an tan dawn tih Thawhlehni khan an puang.
Party thupuangtu, Randeep Surjewala chuan an hruaitu lawkte an thutkhawm zawhah an hmalakna thar tur hi a puang a ni.
Jan Jagran Abhiyan hi a hun tur la puan loh, parliament thlasik thutkhawm neih hma leh state pangaa assembly inthlan lo awm tur hmain eptu party hian a huaihawt dawn a ni.
Congress hruaitu lawkte hi Thawhlehni chawhma lam khan state inthlan lo awm tura hma an lak dan turte sawihovin an thukhawm a. President Sonia Gandhi chuan an hruaitute chu Congress tichak tura hma la tur leh anmahni mi mal hmathlir pawh dah pawimawh turin a ti.
Gandhi-i chuan an pawl leh state hruaitute inkarah ‘thil tum leh tih tur chianna leh inpumkhatna a awm lo’ niin a sawi a. An hruaitute chuan a bulthuta thu ken pawimawh tur ang chi hmaih an nei niin a sawi bawk.
Thawhlehnia an thutkhawmnaah hian party president hlui, Rahul Gandhi bakah general secretar te, in-charge nei hrang hrang leh pradesh president te pawh an tel a. An pawl chhunga harsatna awmte an sawho va, siam rem dan tur an ngaihtuah.
Gandhi-i chuan, “Kan rama mipui rorelna, kan danpui leh Congress party thutlung vawng him turin peih chikima kan inpeih a ngai a, mi tih dik lohte pawh bei tura kan tan a ngai. Pawisak nei lova campaign thin BJP/RSS thuthlung kan bei dawn a. Hnehna chang tur chuan tih tak taka beiin mipui hnena dawt an sawite hai chhuah a ngai a ni,” tiin a sawi tih news agency PTI chuan a tar lang.
Eptu party lian hruaitu lawkte thutkhawm hi kar leha membership drive an tan tur hma lawka neih a ni bawk.
Gandhi-i chuan Uttar Pradesh, Punjab, Goa, Uttarakhand leh Manipur-a assembly inthlan lo awm tura inthununna tha leh an member-ah inpumkhatna tha a awm a tul thu a sawi.