Arunachal Pradesh-a sipaiin silai kah an zirna hmun, shooting range-ah laipui mu la puak lo chhara an tihpuah palh avangin naupang 3 an thi.
He thil hi Pathiannia Anjaw district, Chirang khuaa thleng niin thite hi hmeichhe naupang pahnih, kum 8 leh kum 10 inkar an ni a, mipa naupang kum 2 mi a tel bawk a. Inrinni tlai khan firing range-ah hian kalin laipui mu puak lo hi an chhar a, a tukah a puak ta a ni.
Anjaw SP Habung Hailyang chuan an awmna lai vela thingtlang khuaa mite hian laipui mu hman tawhte hi chharin a aluminium awm chu thil dang siam nan, thenkhat chuan bungbel siam nante an hmang thin tih a sawi a. “Tuna puak palh ta hi a la hlui lutuk lo va; mahse, kum hnih/khat liam tawha mi vel a ni ang,” a ti.
Hailyang chuan laipui mu hman tawh hi chhar fo mah se tun anga hman loh palh chhar puak zui ta avanga chhiatna thleng hi an la hriat ngai loh thu a sawi bawk.
An district Deputy Commissioner Dagbom Riba chuan, “Naupangte hian an thil chhar hi eng eng a nih pawh an hre lo ang a, a puak ta mai si a ni, a vanduaithlak takzet a ni,” a ti.
Arunachal Pradesh deputy chief minister Chowna Mein chuan he thil thlengin a barakhaih thu leh pawi a tih takzet thu a sawi a, tawngtainaah an hre reng tih a sawi bawk.