MNF Media & Publicity department General Secretary VL Krosshnehzova chuan ZPM-in sawhthing hralhna an hmuh zawh tak si loh avangin a hralhna chungchangah an beidawng niin a sawi.
Ningani khan Aizawl Press Club-a thu thar thehdarhtute kawmin VL Krosshnehzova chuan October 31, 2023 khan tual chhung chanchinbu pakhatah ZPM Chief Ministerial Candidate Lalduhoma’n, ‘ZPM a sorkar chuan kum thum chhung sawhthing kan lei phawt ang,’ tiin a lo sawi tawh tih sawiin, “Hei lo pawh vawi tam tak sawhthing lei an tum thu hi an lo sawi tawh thin a. ‘ZPM chuan vote ni lovin thlai thar kan lei dawn,’ tiin kut hnathawktute lung tileng thei ang berin an sawi thin,” a ti.
ZPM-in sawhthing chungchangah hma an la chho tih sawiin VL Krosshnehzova chuan, Market Study Team-te insiamin sawhthing hralhna an zawng a, nasa takin an bei tih an Convener Dr KC Lalmalsawmzauva chuan TV-in an kawmnaah a sawi tih a sawi a. Sawhthing an khai kual fe hnuah sawhthing hralhna an hmuh zawh loh thu sawiin TV interview-naah ZPM Market Study Team Convener Dr KC Lalmalsawmzauva chuan, ‘Sawhthing hralhna tun thleng chuan kan zawng hlawhchham’ tiin a sawi leh si tih a sawi.
VL Krosshnehzova chuan, “Hetianga a hralhna an hmuh zawh tak si loh avang hian sawhthing hralhna chungchangah an beidawng a, Pu Lalduhoma chuan, ‘Sorkar tak takin lei kan tum lem lo,’ tiin TV in an kawmnaah a sawi leh ta si a ni,” a ti.
MNF Media & Publicity GS chuan vawi tam tak sawhthing lei an tum thu ZPM hian an lo sawi tawh a, an tlin hma hauha an boruak a tha nia an hriat atangin an thusawi an thlak leh tan ta mek a, sorkar ngat se chuan an intiamna ang an nih loh nasat turzia a tar lang tih a sawi a. Vote an zawn mek lai pawha an thusawi sut leh zung zung duh party leh leader hi enchhin tlak an ni lo tih Zoram mipuite hian hria se an duh thu leh, tiam mai zel duh ZPM party hian an thil tih dan hi sim se an duh thu a sawi bakah, kut hnathawktute beiseina dik lo pe lo turin ZPM party chu thurawn an pe tih a sawi bawk.