Pakistan Prime Minister Shehbaz Sharif chuan karleh hian China tlawh a tum a, an ram thuneitute chuan cricketer hlui hian an ram sum dinhmun chhe mek chawikang turin puihna a dap dawn niin an sawi.
Tun hnai lawkah Pakistan hian Saudi Arabia ram atanga $ tld 6 puihna tur thu an thlung fel a. Hei hi duhtawk lovin Khan hian China lam a hawi leh ta a ni.
Sharif-a hian Nilainia TV-a thu a sawiah Saudi ram anga anmahni pui thei tur ram dang pahnih an awm thu a sawi a, eng ram nge an nih erawh a sawi lo va. Heng ram atanga puihna an dawn hian International Monetary Fund atanga pawisa an puk tam tak chu a chhawk zangkhai thei dawn a ni.
Foreign affairs ministry chuan PM Sharif-a hian Chinese President Xi Jinping leh Premier Li Keqiang te chu November 2 leh 5 inkara Beijing leh an sumdawnna khawpui, Shanghai a tlawh hunah a hmu dawn niin a sawi.
“Tun tuma PM zin tur hian ram pahnih inkar thil bakah CPEC chungchanga sawi ngaite sawiho a ni ang,” tiin foreign ministry thupuangtu, Muhammad Faisal chuan a sawi a. CEC (China-Pakistan Economic Corridor) an tih hi $ tluklehdingawn eng emaw zat sum hmanna tura ruahman, Chinese khawtlang lam, Xinjiang atanga Pakistan kaltlanga Arabian Sea tlawh pawh theihna tur kawng sialna tur a ni.
Pakistan hian chhuanlam dang siam mah se mi thiam (analyst)-te chuan PM zin turin a tum ber hi chu suma China-in a puih theihna tur a dap dawn niin an ngai thung.