Paris Saint-Germain tan French forward pahnih an che a. Star player Kylian Mbappe leh Randal Kolo Muani ten AC Milan tlarhnung chhaihbuai viau in goal an khung ve ve a, 3-0 in Italian club an hneh.
Nilaini zana Parc des Princes a UEFA Champions League Group F inkhelah hian France forward Mbappe-a’n minute 32-naah kum 17 mi midfielder Warren Zaire-Emery thawhrah sengin ball tha a hmuh chu goal-ah a luhpui a, an goal hmahruai turin a khung.
Second half tan hnu lawkah first half a a goal khung an pawmsak loh Ousmane Dembele chuan Kolo Muani goal khung tur a siamsak ve leh a. Huntawp dawnah Lee Kang-In chuan an goal thumna a khung.
Goal khungtu Kolo Muani chuan, “Inkhel thunun a, hnehna chan kan duh. Second half-ah kan result tichiang turin goal kan khung belh thei a, kha khan kan hmalam atan inrintawkna lian tak min siamsak ang.” a ti.
Group F inkhel dangah Borussia Dortmund in hnehna pawimawh an chang a. St. James’ Park-ah Newcastle United tlawhin 1-0 in an chak.
Dortmund tan Felix Nmecha chuan first half-ah goal a khung a. Second half-ah an inven uluk ngai viau mahse an hum tluan thei a ni.
- Haaland-a’n goal a khung
Champion lai Manchester City tan striker Erling Haaland chuan UEFA Champions League inkhelah match nga goal a khung tawh loh hnuah goal hnih a khung a. Swiss club Young Boys lakah 3-1 in an chak.
Bern a Wankdorf Stadium a inkhel hi khelmual chu phullem phah a nih avangin City manager Pep Guardiola chuan a sawisel a, mahse a naute inkhel atanga thlir erawhin harsatna an nei lo.
First half-ah goal khung lo mahse second half tan hnu lawkah Manuel Akanji chuan goal a khung a. Hei hi Young Boys tan Meschack Elia chuan sut thuai mahse Haaland-a’n penalty atang goal a khung hnuah huntawp hma in goal dang a khung leh bawk.
- Barca pawh la kal zel
Spanish champion in Champions League Group H-ah point 9 hmu turin 2-1 in an mikhual Shakhtar Donetsk an hneh.
Estadi Olímpic Lluís Companys a inkhelah Barca in player pawimawh chhawr theih loh nei nual mahse inkhel an thunun tha hle.
Minute 28-naah Ferran Torres chuan an goal hmahruai a khung a. Minute 36-naah Fermín López chuan an goal hnihna a khung.
Shakhtar tan Heorhii Sudakov chuan second half-ah goal khung ve mahse an si phurh an sut thei lo.