Aizawl: All India Congress Committee (AICC) General Secretary i/c Communication Jairam Ramesh chuan nimin khan Aijal Club-ah thu thar thehdarhtute a kawm a, BJP kaihhruai sorkar hnuaia hnam hnuaihnung zawkte dinhmun sawinghinin a awm mek a, Mizoram pawh dinhmun derthawng takah a ding mek niin a sawi.
Union minister hlui chuan BJP-in mipui then hrana an chungah an duh anga rorel an tum tih a sawi a. BJP-in India dan pui Article 370 an nuai bo thei a nih chuan Article 371(G) pawh an nuai bo thei a. J&K inhung bikna Article 370 an nuai bo a, Nagaland chungchang pawh sawiho mek a ni a, hemi dawta an hmalakna tur chu Mizoram a ni dawn tih sawiin, “Mizote sakhua, hnam ziarang leh nunphung inhumhimna pawh a him rei dawn lo,” a ti.
BJP chuan India ram chu sakhaw pakhat, tawng pakhat leh thil dang dangah inang tlang taka kalpui turin ruahmanna an siam a, an kalpui mek bawk tih sawiin Ramesh chuan, “BJP hian an tum a chiang a. Ram pumah ‘hnam khat, ram khat’ tih thupui an kalpui mek a, Mizote pawh hi he huangah chuan telh tumin ruahmanna an siam a. Mizo hnam, sakhua leh nunphung chu he ruahmanna hmanga thai bo an tum mek a ni,” a ti.
Ramesh chuan Congress party-in India hmarchhak state-te tan an inhumhimna dan special provision a siam tih a sawi a. He dan hi nuai chhiat tuma hmalak mek niin, hemi lo do let tur hian MNF leh ZPM party chuan an ti thei lo va, Congress party chauhin BJP thil tum hi an thiat thei niin a sawi.
AICC hruaitu hian BJP-in Forest Conservation Amendment Act an pass tak khan Mizo tribal-te a tibuai dawn tih sawiin, “BJP hian an pawngnek tawp mai che u a ni,” a ti a. Congress party chuan Mizoram leh hnam himna, hmasawnna chu a duh ber a ni tih a sawi a. Mizoramah sorkarna an chang a nih chuan mipuiten an dam loh nikhuaa an inenkawlna tur Rs nuai 15 thleng ruahmanna siam a nih tur thu leh eirawngbawlna gas LPG pawh Rs 700-ah an tihhniam tur thu a sawi a. Heng ruahmannate hi Karnataka, Rajasthan, Chhatisgarh ah te hlawhtling takin an kalpui tawh a. Madhya Pradesh-ah pawh kalpui an intiam a. A hlawhtlinnate an hmuh avangin Mizoramah pawh hlawhtling taka he ruahmanna hi kalpui theih a nih thu a sawi.
MNF-in kum nga ro an rel chhungin state tan hmasawnna an thlenpui lo tih sawiin Ramesh chuan, SEDP pawh State Empty Development Project-ah an chhuah zo tawh a. Sorkar laipui atangin Rs vbc 3,500 vel chu kut hnathawktute tan te, hriselna kawnga hmasawnna te, horticulture lama hmalakna tur atan dawn belh theihna nei mah se, central sorkar in a pe duh lo niin a sawi bawk.
Ramesh chuan tun hun hi sorkar thlak hun a nih thu leh Mizorama thil lo thleng chu India ram pum tan pawh nghawng na tak nei tur a nih thu a sawi a. Tun hnaiah BJP-in mipui an then hrana zalenna an tibuai tur hi do let a tul thu leh MNF leh ZPM hi BJP luhna hmanrua an nih dawn tih pawh hre reng turin mipui a chah bawk.