Liverpool in an starting XI thlak danglam viau mahse hnehna chang turin harsatna an nei lova, French club Toulouse lakah goal nga khungin Europa League-ah 5-1 in an chak.
Anfield a Group E inkhelah Liverpool in midfield-ah Curtis Jones, Wataru Endo leh Ryan Gravenberch te bul an tan tir a, tlarhmaah Darwin Nunez chu Harvey Elliot leh Diogo Jota ten an tlanpui.
Jota hian goal khung turin minute 9 chauh a mamawh a, Toulouse defender pahnih tlan pelin goal tha a khung. Mahse an khingpuiten an chhanglet har bik lo. Thijs Dallinga chuan Trent Alexander-Arnold-a’n a ‘onside’ tir hnuah goal a khung ve nghal.
Mahse Minute 30-naah Endo-a’n Liverpool tana a goal hmasa ber a khung a, minute li hnuah Nunez-a’n goal a khung leh bawk.
Second half-ah Nunez-a goal ban tih per atang Gravenberch-a’n goal a khung a. Substitute Mohamed Salah chuan an goal hnuhnung ber huntawp hma in a khung.
Reds hian match thum atangin hnehna an la chang vek a, Liverpool boss Jurgen Klopp chuan, “Goal tha tak tak kan khung a, tumah inhliam an awm lova, player naupangten an theihna an lantir bawk. Kan tan zan duhawm a ni. A awlsam vek loh lai a awm tih kan hmu vek a, mahse inkhel erawh kan thunun tha hle.” a ti.
- Seagulls an chak ta
Brighton & Hove Albion in European football a an hnehna hmasa ber an chang a. Match hnih chhung nghah tir an nih hnuah tun season a che buai tak Ajax lakah 2-0 in hnehna an chang.
Amex Stadium-ah Brighton tan hian halftime dawnah Joao Pedro chuan goal a khung a. Second half tan hnu lawkah Ansu Fati chuan a club tana a goal thumna a khung a. Khelh thum atang point li hmu in knockout stage khel thei turin an dinhmun an siamtha.
Roberto de Zerbi chuan, “Europe ah Brighton in a vawikhatna atan hnehna kan chang. Zanin hi kan fans te tan leh club tan, club neitute tan zan duhawm a ni a. Hetiang kan thlentirna ni hi kan tan chuan chhinchhiahtlak a ni.” a ti.
- Inkhel dang
English club West Ham United erawh Europa League-ah tun season-ah a vawikhatna atan an tlawm a. Olympiakos in 2-1 in an hneh.
Georgios Karaiskakis Stadium-ah Hammers defence in first half tawp lamah goal hnih an chhuah a. Kostas Fortounis chuan goal hmasa zawk khungin Angelo Ogbonna own goal an neih belh bawk.
Second half-ah Hammers in na takin nawr zui mahse huntawp dawnah Lucas Paqueta goal khung bak goal an hlawhchhuak thei lo.
Italian club AS Roma tan striker Romelu Lukaku a vul zel a, tun seasona a goal 8-na ni turin goal a khung a, Slavia Prague 2-0 in an hneh. Belgian striker hian a zawnin Europa League match 14-ah goal a khung tawh.