Aizawl: Mizo Zirlai Pawl (MZP) General Headquarters-in nimin khan an pawl din champha phak vawi 88-na lawmna leh zirlai hruaitu pass tharte lawmpuina hun an hmang.
MZP Pisapuia hun hmanah hian Lalsangliana, Director, School Education department chuan khuallian nia hmanpuiin thu a sawi a. Zirlaite pualin zirlai zawng zawngte duhsakna hlanin, “Zirna tha kan tih hi, zirna in (institution)-ah chauh a innghat lo va. Zirlaiteah thui tak a innghat a ni,” tiin, hlawhtlinna hi zirtirtuah a innghah thui hle tih a sawi.
MZP President H Lalthianghlima pawhin thu sawiin zirlaite chu ruihtheihthil laka fihlim tur leh vawi khat tihchhin a pawizaite a sawi a, “Zirlaite min tichhetu a nih avangin tihchhin loh a him ber a ni,” a ti.
H Lalthianghlima chuan tun thlenga scholarship 2nd installment sem a la ni lo chu a vei thu a sawi a. Zirlaiten an chanvo scholarship an dawn vat theih nan a enzui reng a, November 3, 2023 hma ngeia zirlaite account-ah a lut lo a nih chuan na takin nawr an tum thu a sawi.
Zirlaite Ni pual inkhawmah hi MZP Vice President C.Lalremruata’n hun a kaihruai. a. He hunah hian zirlai hruaitu pass thar mi 68-te lawmpuina hlan an ni a, heng zingah hian MZP General Headquarters Executive Committee Member, Hnampual Zirlai Pawl hruaitu, MZU Student Council, Students’ Bar Council leh College Students’ Union Leader te an tel a ni.