BJP National President JP Nadda chuan nimin tlai khan Mizoram thlengin Regency Hotel-ah Mizoram State Assembly inthlanpui atana BJP manifesto a tlangzarh a. Mizoram sorkar flagship programme SEDP-ah eirukna a awm leh awm loh chhui chiang turin Special Investigation team din a nih tur thu a sawi.
BJP manifesto, ‘Vision Document 2023’ tlangzarhtu Nadda chuan Mizoram State Assembly inthlanpuiah sorkarna an chang a nih chuan SEDP-a dan ang lo hmalakna leh eirukna a awm leh awm loh chhui chiang turin Special Investigation team din a nih tur thu a sawi a. Sorkar hun kal meka sum hman dan dik lo tar lanna ‘White Paper’ tlangzarh a nih tur thu leh sorkar term kal meka eirukna thubuai awm zawng zawngte chu chhui chian a nih tur thu a sawi a. An sorkar atanga thla ruk chhungin eirukna thubuai an chin fel vek tur thu a sawi.
BJP-in sorkarna an chang a nih chuan mipuiten an dam lo nikhuaa an inenkawlna turin Rs nuai 5 atangin Rs nuai 10-ah an tihpun tur thu te, Zoram Medical College chu Regional Institute of Medical Sciences (RIMS)-ah hlan kai nih tur thu te, ZMC-ah Specialist Post Graduation course an tih thar thu te, district hospital tinte chu super speciality hospital-ah tihchangtlun a nih tur thu te, Mizoram hriselna kawnga hmasawnna ruhrel atan Rs vbc 500 ruahman a nih tur thute a sawi.
BJP national president hian Mizoramah sorkarna siama thuneihna an chang a nih chuan sorkar enkawl zirna inte tihchangtlunna atan Rs vbc 150 leh college tan Rs vbc 350 ruahman a nih tur thu leh Mizoram Sports Talent Development Programme atan Rs vbc 25 ruahman a nih tur thute a sawi.
Hmeichhia fa piangte tan Rs nuai 1.5 pek a nih tur thu te, sorkar hna lakah hmeichhiate tan zaa 33 hauhsak a nih tur thu bakah Mizorama hmeichhe police battalion hmasa ber ni turin Mizoram Hmeichhiate Battalion din a nih tur thu a sawi bawk.
National highway ngaih pawimawh a nih tur thu sawiin Nadda hian, Siaha atanga Aizawl inkar te, Lunglei leh Tlabung inkar te, Zorinpui leh Longmasu leh Aizawl Bypass te tihchangtlung a nih tur thu te a sawi a. Mamit ang bawkin Siaha pawh aspirational district-ah puan a nih tur thu te, Mizo kût chi hrang hrangte chu chhawm nun zel a nih tur thute a sawi bakah Mizoram leh Assam ramri buaina te chu chin fel a nih tur thute a sawi a ni.
BJP National President Nadda hian nizan khan Mizoram Kohhran Hruaitute bakah Central YMA hruaitute leh Bru hruaitute a kawm nghal a. Vawiin hian Chawngte a pan ang.