Mizoram a kan thlai chinah chuan sawhthing leh hmarcha hi suma kan chantir tam deuh ber pawl a ni a. Kuhva hi chu a chinna area deuh awm anih avangin ram tina chin a rem lova. Sawhthing hi chu kan ram khawi laiah pawh a chin theih titih a. Chuvang chuan mi nawlpui hian kan buaipui deuh ber thlai a ni a. Mipui buaipui anih avang hian kan ram politics ah pawh hmun a chang lian hle.
Party hrang hrangin sawhthing market chungchang an lo sawi tawh thin a. Tunhma khan congress sawrkarin a buaipui nek tawh a. An ropui phah loh chu sawi loh, an hmingchhiat pui ani ber mah zawk a. Political party ah ZNP khan an aupui nasa a. Amaherawhchu an party khan mi rin an hlawh phah chuan lova. Ruling party beih nan bera an hman rualin a sawitute kha mi rin an ni tlat lova. Sawhthing kha a takin an vei lo emaw tih turin opposition party an ni chunga market zawng tura tih theih chin awm han buaipui pawh kha an nei lem lova. A tak ram ni lovin mipui khan an hria ani mai thei. Mipui hip nan sawhthing chu sawrkarin kan lei mai ang tihte, a man tur chu budget ah kan dah ang, DAH ani mai te an han ti a. Mipui erawhin rinna an pek phah lem lo.
Sawhthing market hi sawi ngawt aia khirh zet mai a ni a. Rate hi kumtin hian a danglam duai duai a. State dangin an thar tam leh tam lohah te a innghat a. State dangin an ngah kum chuan a man a tlahniam duai a. An thar tlem chuan chuan a man a kang leh daih thung a. Chutiang anih avang chuan political party dang hian sawhthing marketah hian an ngaihtuahna an hmang uluk hle. Sawi pawh an sawi tam vak ngam lem lo.
Sawhting market sawi vungtu ber Pu Lalduhawma chuan tunhnai khan a khirh ruk zek thu hi a hrechiang ve ta ni ngei tur a ni. Sawrkarin sawhthing kan lei dawn lo, a leitu tur mgaihtuahtuah kan tang dawn tiin a pha leh ta a. Mi tam tak phei chuan an hmuh le loh phah viau.
Chutiang anih avang chuan sawhthing chungchangah hian political party te hian an buaipui anih pawhin sawhthing process na lam hi mipui sawihmuh se a fuh ber hmel a. Kan ram a kilkhawr a. Transportation lam a thui a. A kar lakah chhiat theihna a tam lutuk a. Kan ramah hian a tih rona khawl te nei ila. A ro a kan hralh theih hunah chuan politics ball ani tawh lovang a. Chutih hunah chuan sawhthing chingtute chuan a hlawkna tak tak an hmu kumhlun thei tawh zawk ngei ang.