India chuan Qatar rama court-in a lawng sipai hlui mipa pariatte puhna mumal tak awm lova thi tura a hremna chu dan hmangin theihtawpa beih let a tum tih a sawi.
Qatar-a mi mal company hnuaia thawk mipa pariatte hi ram enthlatu-ah puh niin nikum khan man an ni.
Qatar leh India hian an puhna hi chiang takin an la sawi lo ve ve.
Ningani khan Indian sorkar chuan Qatari thuneitute thutlukna siam chuan ‘a barakhaih tak zet’ tih an sawi.
India-a foreign ministry chuan court thutlukna kimchang an ngaihchan mek thu leh ‘eng ang chiaha pawimawh nge a nih’ pawh hriat an tum tih an sawi.
“An chhungte leh dan thiamte nen kan inbepawp reng a, dan hmanga chet lak dan tur dap mek a ni,” tiin ministry chuan thuchhuahah a tar lang a. A bak chu ‘he thubuai hi tlangzarh remchang lo thil’ a nih avangin sawi zau a remchang rih lo tih an sawi bawk.
Indian sorkar thuchhuahin a tar lan dan chuan heng mite hi mi mal company pakhat, Al Dahra an tiha thawk an ni a; mahse, Indian Navy officer hluite tia sawi an ni deuh ber zawk.
Nikum khan parliament rorel inkhawmah Foreign Minister S Jaishankar pawhin ‘ex-servicemen’ tiin a lo sawi tawh a. An zinga thenkhat chhungte pawhin tute nge an nih leh Navy-a hnuhma an lo neih tawh dante chu tual chhung chanchinbu thenkhat hnenah an lo sawi tawh bawk.
Nikum August thla khan man niin India-ah chuan sawi a hlawh hle a; mahse, an laka thubuai siamsak tak hi chiang taka sawi a awm lo.
The Hindu chuan ‘thuruk pawimawh bik bawhchhia’ nia a tar lan laiin sorkar chuan hei hi a ni ngei tih a sawi ve lo.
Mi thiamte chuan he thuremna hian ram pahnih inkar pawh a nghawng thei dawn niin an ngai a. “Qatar-ah hian Indian 7,00,000 chuang awmin eibarah kan inzawm tha hle a. Indian sorkar hian he thubuai hi ngun takin a vil a; mahse, an nunna a him theih nan fimkhur taka a chet a ngai,” tiin Qatar-a India palai lo ni tawh thin, Deepa Gopalan chuan The Hindu hnenah a sawi.
December thla khan Jaishankar chuan parliament-ah Qatar nen he ‘thubuai pawimawh tak’ hi an sawiho reng tih a sawi.
“An ngaimawhte pawh kan rilru-ah a awm reng a. Ambassador-te leh thuneituten Qatar sorkar hi an dawr reng a, kan ngai pawimawh em em a ni,” a ti.
Gulf-ah hian Indian maktaduai tel an cheng a, sang telin hlawh sang ni lem lo leh thiamna ngai lutuk lem lo chi an thawk nasa hle.
Ram dang atanga inhlawha awmte hi Gulf Arab ramte eibara an sanna chhan leh in ropui tak tak an sak theih chhan a ni pakhat a, India tan pawh sum lak luhna remchang tak a ni ve bawk.