Aizawl : MPCC President Lalsawta chuan Congress party an sorkar a nih chuan SSA zirtirtute harsatna an chinfel tur thu leh, an hna ngai an thawh leh ngei theihna atan hman an la dawn niin a sawi.
Zirtawpnia Congress Bhawan-a Friday Political Session leh mi thar lawm luh inkhawm an neihah Lalsawta chuan, SSA zirtirtu lungawi lote chu High Court-ah sorkar nen an inkhing a. SSA hian chakna an chang chungin, MNF sorkar hian an duh ang a tihhlawhtlin sak thei lo chu pawi a tih thu a sawi a. Congress an sorkar chuan SSA zirtirtute harsatna an chinfel tur thu sawiin, “An hna ngai an thawh leh vek theih nan ruahmanna kan siam ang. Vawi leh khatah an zavaia kan thawh tir thei lo anih pawhin a tahtawlin an hna ngai kan chelh tir leh ang tih ka tiam a ni,” a ti.
Lalsawta chuan ram chhungah indona a chhuah thusawiin, BJP hian Hindutva an atchilh a, India ram chu Hindu lalna rama siam tumin UCC tih puitlin an tum a. Parliament Session hnuhnung berah khan Constitution chhut thar kha MP Lok Sabha leh Rajya Sabha te hnenah an sem vak mai a. India dan bua Preamble a Secular leh Socialist tih hi an paih leh Forest Amendment Act an pawm te kha Kristian leh Mizoram tan a pawi leh zual tih a sawi.
MPCC President chuan BJP in Kristianna tidal tura an luhka atana tualto party MNF an hman dan chungchangah Congress party hian dawt an sawi lo tih a sawi a. ZPM te pawhin sorkarna lo siam palh ta se BJP hmanrua tho tur an nih thu an hotute ka atang pawhin a hriat fo avangin, sakhaw zalenna duhtu leh BJP thawhpui ve hauh lo tur Congress Party thlawp chu Mizo Kristian an nihna angin a inhmeh em em a, bial tina Congress Party candidate vote theuh turin Mizoram mipui a sawm.
MPCC Secretary D.R. Zirliana kaihhruai inkhawmah hian MPCC President in an party-ah mi eng emaw zat a lawm lut a ni.