Prime Minister Narendra Modi chu India zalen hnua prime minister hlawhtling berah Home Minister Amit Shah chuan chhalin kum 2014-ah ram chhungah ‘Ramrajya’ a thlen niin a sawi.
Nilainia thu a sawinaah mipuiin dawhthei taka nghakin BJP chu thuneihna chang turin an thlang chhuak a, kum 30 chhunga inhnehna sang ber an chantir tih Shah chuan a sawi.
“Kum 1960 chho atanga 2014 thleng khan mipuiin party tam tak telna (multi-party system) hi a tha em tih an zawt thin a. Kum 2014-ah khan suangtuah thin, Ramrajya (Lord Ram-a duh ang rorelna) chu a lo thleng ta a ni,” tiin Modi-an Gujarat leh sorkar laipui a kaihhruai tan atanga kum 20-na tlin champha pualin a sawi.
“Mipuiin a vawi khat nan BJP chu Congress ni lo mahnia sorkar siam thei khawpin an thlang tling a. Prime Minister Modi-a hian amah insawi lo mah se kei chuan India zalen hnuah prime minister hlawhtling ber ka ti a ni,” a ti.
Shah-a thu sawi hi Congress chuan an helh nghal hle a, BJP chuan grand old party, an hruaitu leh an icon, prime minister hmasa ber, Jawaharlal Nehru te a bei niin an sawi.
Nilainia hun hman thupui hi ‘Reviewing The Two Decades of Narendra Modi As Head of Government’ tih a ni.
“A huaihawttute hian ‘nang aia Pu Modi-a hre chiang an awm lo’ min ti a; mahse, an hre sual a ni, ram mipuite hian kei aiin an hre chiang zawk daih,” a ti.