Bangladesh khawpui, Dhaka-a special court chuan an ram Prime Minister hlui, Khaleda Zia chu a pasal thi tawh hminga mi tanpuitu pawl a din hminga pawisa a lak luh dana ei rukna lian takah thiam loh chantirin kum 7 lung in tang turin a ti.
Judge Md Akhtaruzaman chuan nimin khan Zia hremna thubuai hi a puang a, prime minister a nihna chu hmang dik lovin $375,000 (an ram pawisa taka mtd 31.5) lai Zia Charitable Trust Fund tan, a lakluhna hriat si lohvin a nei tih hriat a ni.
Nimina a laka hremna an puan lai hian Zia hi court-ah a inlan lo va, damdawi inah a awm daih a. February thla khan hetiang thubuai, charity corruption case-ah bawk hian court dangin thiam loh chantirin kum 5 lung in tang turin a hrem mek a, a hriselna a that loh avangin damdawi inah a awm mek thung a ni.
Zia-i kaihhruai party chuan heng thubuaia thiam loh an chantir hi an pawm lo va, politics a inrawlh ngei nia an hriat thu an sawi.
Judge hian Zia rual hian mi dang 3 pawh, Zia ang bawka pawisa an lakluhna hriat si lohva hausa, ei rute chu kum 7 theuh tang turin a ti bawk.