India ram politics inher vel hian na takin min hrut tel lo thei lo tih kan hre vek a. Hun kal tawhah engnge thleng, eng ang ram rorelna nge kan neih? Democracy ram, sakhaw zalenna ram zalen tak ni thin kha tunah engnge kan dinhmun le? Bjp sawrkar kan neih atang khan kan chhui kir thiam vekin a rinawm. Kan missionary kalchhuakte au aw hriat tur a tam ta hle.
Ram kil khawr taka hnam tlemte, ei leh bara rethei leh dinhmun him lo tak, eng danin emaw a humhim hram hram kan ni a. Chutih laiin central lama thuneitu bjp sawrkar chuan India chu hnam lian ber, a tam berte duh dan leh kaldan a rorelna kalpui tumin ke a pen muah muah mek bawk a. Mahse, khawvel mithmuha mawi leh mawi lo an la dawn ve avangin vawileh khata, a lang a pau a hma han lak pup pup chu an la ti chiah lo a. Zawi zawia anmahni kalphunga min hnuh luha, min eiral an tum mek a ni. An kalkawnga anmahni dal thei dan reng reng chu centrala an thuneihna hmangin an thiat hret hret a. Parliament rorelna hmangin hnam tenaute hrut rala, kan inhumhalhna dan chu thiam tak maiin an thiat hret hret a. Forest act 2023 an pass thar hmang ringawt pawh hian kan ram chhungah an duh duh project an din thei tawh a. An duhna lai laiah national highway chu an lai tlang pawp pawp thei tawh a ni. Tunah hian inhumhalhna dan kan tih ve chu parliament hmangin an chungtlak vek tawh a. Sawi buai theih kan nei tawh lo.
Amaherawhchu sawi tawh angin kan zinga rawn tal luh a, kan thinlung hmin hmasak a, anmahni duh dan hawi zawnga min kalpui an la tum hram hram a. Chumi tur chuan kan zingah an thurualpui theih tur an zawng mek. India hmarchhak hi kan rilru ang pu mi hlir an nih avangin vawilehkhata an party min rawn barh mai an la duh lova. A chhunga an thurualpui tur han dap erawh an thiam takzet. Anmahni lo do ber tur nia an hriat political party te chu an thurualpui hmak hmak a. Northeast a regional party te an kuah khawm mek zel. Suma tanpui an inhuam em em a. Thuneihna leh pawisa hmangin an hling chat chat ani ber mai.
Inthlan lai hi an hmalak theih hun lai ber a ni a. Kan hma lawka inthlan kan neih turah pawh ril takin an rawn inrawlh a. A theihna mual mualah chuan anmahni party te ngei thlan tlin tura an duh Regional party te thurualpui dan an thlir kar reng a. Bjp hian kan sakhua leh hnam boralna kawng zawha regional party te hruai kawi hi englai pawhin an tum reng a ni. Kan sawrkar lai mek pawh thui tak an hnuk kal tawh a. Parliament ah a hmaa an duh loh em em CAB pawh an pass pui ta anih kha. Khatiang kha an hnuh kal dan chu a ni. Chuvangin tunah hian kan hnam himna ber tur chu engtizawng pawha bjp thurualpui lo tur party vote tlin mai hi a ni ber. Mnf ani emaw, Zpm ani emaw, sawrkarna an chelh hunah bjp in huai takin an thlem ngei dawn a. A mala an sawrkar nalh thei anih loh phei chuan bjp Mla tling ten an han thlawp ang a. An harsat hauh lovang. Chuvangin huai taka an thlem chhin eih ngam loh tur central party vote hi hnam chhanna ber ani ta. Kan ram, kan hnam, kan sakhua humhima a awmna turah ngei vote i thlak ang u.