Bundesliga champion Bayern Munich in league table chung ber luah lailawk turin SV Darmstadt 98 lakah hnehna an chang a. First half a red card tum thum phawrhna inkhelah 8-0 in an chak.
Allianz Arena-ah Inrinni zanah thla 10 chuang inhliam avanga inkhel tawh lo Manuel Neuer-a’n a vawikhatna atan Bayern tan inkhel a hmachhawn leh a. Khelmual an luhin an fans ten thawm ring tak nen an lo lawm.
Mahse Neuer-a boruak hliahkhuhin a awm hma hle. Bayern midfielder Joshua Kimmich chuan ball a lak sual avangin Marwin Mehlem a pawttlu a, minute 4-naah red card a hmu nghal.
Minute 21-naah mikhual team in red card hmu in Klaus Gjasula chu Konrad Laimer tih tluk vangin hnawhchhuah a ni a. Minute 41-naah Matej Maglica chuan Harry Kane a tihtluk avangin a hmu leh bawk.
Bundesliga inkhelah first half a ‘straight red card’ tum thum phawrh a nih vawikhatna a ni.
Second half tan tirah Kane-a’n goal khungin Bayern in hma an hruai a. Leroy Sane chuan minute li hnuah chhunzawmin minute li danah Musiala leh Sane bawkin an khung leh.
Minute 69-naah Kane-a’n anmahni mual lam hnaih atangin a pet goal a. Minute 71-naah Thomas Muller chuan khung belhin Musiala in goal a khung leh hnuah English striker in hattrick a siam.
Bayern coach Thomas Tuchel chuan, “Khingpui hautak tak an ni a, mahse first half kha chu inkhel danglam tak a ni. First half-ah tihsual kan ngah a, kan dul bawk. Chawlh hnuah erawh kan tihtur kan chiang a, kan tam zawk kha a hriat bawk a ni.” a ti.