Karnataka Energy Minister KJ George chuan Mizoramah Congress-in sorkarna a chang a nih chuan mipuiten an dam loh nikhuaa an inenkawlna turin Rs nuai 15 thleng health insurance hnuaia kalpui a nih tur thu a sawi.
Inrinnia Aijal Club-a thu thar thehdarhtute a kawmnaah George chuan Mizoramah Congress an sorkar chuan cancer leh natna khirh zual bik tan Rs vbc 5 thleng ruahman a nih thu a sawi a. Congress sorkarin Karnataka, Rajasthan leh Chhatisgarh-ah te hlawhtling taka an kalpui angin BPL chhungkaw tan gas cylinder chu Rs 750-a tihhniam a nih tur thu a sawi bawk.
George chuan Karnataka-ah BJP-in khawtlang nun nasa taka chawk buaiin, a bik takin hnam tlem leh hnuaihnung zawkte an tihduhdah thu leh sakhaw biak in thlenga an tihchhiat thu a sawi.
Rahul Gandhi-a’n Bharat Jodo Yatra a kalpui avang hian BJP-in India ram mipuite chunga hliam a lo siam tawh zawng zawngte chu nasa takin a thawi dam a, a bik takin Karnataka mipuite hnenah beiseina nasa takin a siamsak tih sawiin, “Mipuite chu inpumkhatna kawngzawh turin an rawn penchhuak ta a, chumi nghawng chuan Karnataka-ah te Congress chuan sorkar a lo siam thei ta a ni,” a ti.
George chuan Congress sorkarin Bengaluru chu IT hub-ah siamin, hei vang hian mipuite, a bikin thalai maktaduai telin eizawnna an neih phah nia sawiin, “Karnataka-ah chuan Congress chuan kan thutiamte kan tihlawhtling mek a ni. Kei pawh energy minister ka ni a, kan sorkar chuan mipuite hnenah power unit 200 chin kan ngaidam a, a bak an hman chuan chauhin an hman man an chawi a ni,” a ti.
Mizoram thalaite hian eizawnna mumalte an mamawh a, dinhmun tha a din an duh ve a ni tih an hriat thu sawiin George chuan, “MNF leh ZPM hian central sorkar an thawhpui theih an neih a ngai a, chu chu BJP a ni. BJP chet dan kan hria a, anmahni hmachhawn theitu awmchhun chu Congress party chauh an ni,” a ti bawk.