Spanish football a inkhel boruak lian leh nghahhlelh ber a a inlan hmasak berah Jude Bellingham-a’n beisei a nih ang ngeiin danglamna a siam a. Goal hnih khungin 2-1 in Barcelona lakah hnehna an chang.
Inrinni zanah Estadi Olímpic Lluís Companys-ah champion lai Barcelona in an hmelma Real Madrid an mikhual a. Duhthusam a bul tan zawk chu mualneitu lam an ni.
Real Madrid tlarhnung talbuai chu midfielder Ilkay Gündogan-a’n remchangah a la a. Minute ruknaah goal a khung.
First half-ah Barcelona an chungnung zawk a, ball thunun zawka chance siam hnem zawk an ni chungin an khung thei lo.
Second half-ah Real Madrid in Eduardo Camavinga leh Toni Kroos te an dah luh hnuah an inkhel in hma a sawn a, first half aiin an hlauhawm zawk.
Minute 68-naah an remchang mumal neih hmasakah Jude Bellingham-a’n goal mawi khungin an si phurh a sut a. Huntawp dawn hun pek belhah English midfielder bawkin Luka Modric ball vawrh luh tha tak chu goal-ah a khung.
Kum 20 mi English midfielder hian tun nipui a Real Madrid a zawm hnuah match 13 an tan khel tawhin goal 13 leh assist vawi thum a nei tawh a. Spanish football star thar ni turin a invawrh mek.
Real Madrid manager Carlo Ancelotti chuan Bellingham fakin, “Inkhel harsa takah a goal hmasa zawk khan engkim a thlak danglam. A rilru puthmang avang hian kum naupang tak la ni mahse player tawnhriat nei tha tawh tak ang mai a ni.” a ti.
Barcelona manager Xavi Hernandez chuan, “Draw pawh ni ila kan tan result lawmawm a ni lovang. Darkar khat chuang kan thunun a, mahse football chu hetiang hi a ni thin. Chance vawi thum vel an neih atangin goal hnih an khung a, kan tan a pawi ta a ni.” tiin chak phu zawk an nih thu a sawi.